سری نگر// وائس چانسلرکلسٹر یونیورسٹی پروفیسر قیو م حسین کی صدارت میں یونیورسٹی کی دوسری اکیڈیمک کونسل میٹنگ منعقد ہوئی جس میں اُنہوں نے کئی نئے کورسز متعارف کرنے کی تجویز پیش کی ہے۔اِس موقعہ پر وائس چانسلر پروفیسر قیوم نے خطاب کرتے ہوئے یونیورسٹی کے مشن اور نظریۂ کو مد نظر رکھتے ہوئے نئے جاب اور ینٹیڈ پروفیشنل اور ووکیشنل کورسز متعارف کرنے کی ضرورت پر زور دیا۔اُنہوں نے کہا ،’’ یہ کورسز نہ صرف صنعتی ضروریات اور متعلقہ شعبوں میں کی گئی تکنیکی ترقی کو پورا کرتے ہیں بلکہ یہ قومی تعلیمی پالیسی ( این اِی پی ۔2020) کی عمل آوری کے مطابق بھی ہیں۔‘‘مجوزہ کورسز میں آرٹیفیشل انٹلی جنس اور ڈیٹاسائنس میں ماسٹرس اور آنرس پروگرام ، جیولوجی اور کمیونٹی سائنس میں ایم ایس سی ، اردو ، کشمیر ، ہندی اور جنرل سٹیڈیز میں ایم اے ، سپورٹس سائنس اور ورزش ، سپورٹس مینجمنٹ ، گرافک ڈیزائننگ اور ویژولائزیشن میں اعزازی پروگرام ،بی اے۔بی ایڈ،بی ایس سی ۔ بی ایڈ،بی اے ۔ ایل ایل بی ،ڈیجیٹل مارکیٹنگ ، جی ایس ٹی اور ٹیکسزیشن ،بلاک چین مینجمنٹ ، کلائوڈ کمپیوٹنگ ، سائبر سیکورٹی ، جرمن اور فرانسیسی زبان میں ڈپلوما پروگرام شامل ہیں۔یونیورسٹی مجوزہ کورسز کو چلانے کے لئے فیکلٹی کے مطلوبہ عہدوں اور بنیادی ڈھانچے کی مدد کے لئے اعلیٰ تعلیم محکمہ سے رجوع کرے گی۔اِس سے قبل اِنچارج رجسٹرار ڈاکٹر خورشید احمد میر نے اراکین کو ایجنڈے میں شامل مختلف آئٹمزکے بارے میں بریفنگ دی جن میں توثیق کے لئے بنائے گئے معاملات اور اعلیٰ فیصلہ ساز اِداروں میں غور کے لئے تجویز کئے گئے امور شامل تھے۔اِس موقعہ پر موجود اَفراد میں ڈین اکیڈمک افیئرس پروفیسر مشتاق احمد لون ، مختلف فیکلٹیوں کے ڈین ، حلقہ کالجوں کے پرنسپلوں او رمربوط پروگراموں کے کوآرڈی نیٹر ،ڈائریکٹر ایجوکیشن سکاسٹ کشمیر پروفیسر نثار خان خصوصی طور پر مد عو کئے گئے تھے۔کلسٹر یونیورسٹی جموں کے ممبران بشمول ڈاکٹر نوین آنند ، ڈاکٹر گیتا نجلی رانا ، ڈاکٹر سنجے کمار اور ڈاکٹر سندھو کپور نے بذریعہ آن لائن میٹنگ میں شرکت کی ۔ٍ اکیڈیمک کونس کے زیر غور آنے والے دیگر آئٹمز میں رِی ایو یلیویشن کے طریقہ کار سے متعلق قوانین میں ترامیم ، این اِی پی ۔2020 کے پیش نظر اِمتحانی اَنداز میں تبدیلی ، کالج کے اَساتذہ کو بطورِ ریسرچ سپر وائزر تسلیم کرنا، پانچ روزہ ہفتے کے ورکنگ شیڈ ول کا قیام، وومن سٹیڈی سینٹر اور این سی سی کا تعارف بطور پیشہ ورانہ / اِنتخابی مضمون شامل ہے۔ وائس چانسلر نے حلقہ بندیوں کے کالجوں کے کام کاج کو این اِی پی ۔2020 کے ساتھ ہم آہنگ کرنے کی ضرورت پر زور دیا جس میں بین الضابطہ اور کثیر الضابطہ نقطہ نظر کی ضرورت ہے۔ اُنہوں نے یونیورسٹی کے تعلیمی فضیلت کے حصول کے مقصد کا ذکر کرتے ہوئے یونیورسٹی کے تمام شراکت داروں پر زور دیا کہ وہ لگن اور اتحاد کے ساتھ اس سمت میں کام کریں۔اِنچارج رجسٹرار ڈاکٹر خورشید اے میر نے کہا کہ اکیڈمک کونسل کے فیصلوں/قراردادوں پر عمل درآمد کو تیز کرنے کے لئے جلد از جلد دیگر مجاز اِداروں سے ضروری منظوری لی جائے گی۔ڈین سکول آف ہیومینٹیز اینڈ لبرل آرٹس پروفیسر دیبا سرمد نے شکریہ کی تحریک پیش کی۔
