وزیر جاویدرانا کابابو نور محمد نور کے اِنتقال پراِظہارِ تعزیت

جموں//وزیر برائے جل شکتی ، جنگلات و ماحولیات اور قبائلی اَمور جاوید احمد رانا نے گجر بکروال قبیلے کی ایک قابلِ احترام شخصیت بابو نور محمد نور کے اِنتقال پر گہرے دُکھ کااِظہار کیا ہے ۔ وزیر نے اپنے تعزیتی پیغام میں مرحوم بابو نور محمد نور کوعظیم اور گہری ثقافتی جڑوں کے حامل ایک ایسی شخصیت قرار دیا جن کی زِندگی گوجری بولنے والی کمیونٹی کی بھرپور روایات، اَقدار اور تہذیب کی عکاس تھی۔وہ ایک عظیم شاعر اور ادیب تھے جن کی تخلیقات نے قبیلے میں انہیں بے پناہ مقبولیت بخشی ۔ وزیر نے کہا کہ ان کی وفات نہ صرف ان کے کنبے کے لئے ذاتی نقصان ہے بلکہ ان تمام لوگوں کے لئے بھی ایک بڑا نقصان ہے جو قبائلی کمیونٹی کی ثقافتی اور سماجی وراثت کو عزیز رکھتے اور اس کی حفاظت کرتے ہیں ۔ وزیر نے مشہور قبائلی کارکن اور کلا کیندر کے سیکرٹری ڈاکٹر جاوید راہی اور سوگوار کنبے کے دیگرلواحقین کو دِل کی گہرائیوں سے تعزیت پیش کی ۔ اُنہوں نے مرحوم کی روح کو ابدی سکون اور سوگوار کنبے کو اس ناقابلِ تلافی نقصان کو برداشت کرنے کی ہمت کے لئے دُعا کی۔