کشمیر میں طبی تعلیم کو فروغ ملنے کے ساتھ شعبہ صحت کی صلاحیتوں میںبھی اضافہ ہوگا/ جے پی نڈا
سرینگر / این این بی // سخت ترین حفاظتی انتظامات کے بیچ مرکزی وزیر صحت جے پی نڈا وارد کشمیر ہوئے جس دوران انہوں نے ایمز اونتی پورہ کی تعمیراتی پیش رفت کا جائزہ لیا ۔ اس موقعہ پر تعمیراتی کام مارچ 2027 تک مکمل کرنے اور ادارے کو جلد فعال بنانے کی ہدایت دی اور کہا کہ او پی ڈی خدمات دسمبر 2026 سے قبل شروع کرنے کا ہدف مقرر کیا گیا ۔ نیشنل نیوز بیورو ( این این بی ) کے مطابق مرکزی وزیر صحت و خاندانی بہبود اور کیمیکلز و فرٹیلائزرز جگت پرکاش نڈا نے جنوبی کشمیر کے اونتی پورہ میں زیر تعمیر آل انڈیا انسٹی ٹیوٹ آف میڈیکل سائنسز (ایمز) کی تعمیراتی پیش رفت اور اسے فعال بنانے سے متعلق انتظامات کا تفصیلی جائزہ لیا۔ اس موقع پر انہوں نے متعلقہ ایجنسیوں کو ہدایت دی کہ ادارے کے باقی ماندہ تعمیراتی کاموں کو تیز رفتاری کے ساتھ مکمل کیا جائے اور ایمز کو جلد از جلد فعال بنانے کے لیے تمام ضروری اقدامات بروئے کار لائے جائیں۔مرکزی وزیر نے کہا کہ ایمز اونتی پورہ کی بروقت تکمیل سے جموں و کشمیر کے لوگوں کو معیاری اعلیٰ سطح کی طبی سہولیات اور خصوصی علاج معالجے تک رسائی حاصل ہوگی۔ انہوں نے دشوار گزار جغرافیائی حالات اور دیگر مشکلات کے باوجود ادارے کی اہم عمارتوں کی تعمیر مکمل کرنے پر سینٹرل پبلک ورکس ڈپارٹمنٹ (سی پی ڈبلیو ڈی)، متعلقہ اداروں اور دیگر فریقین کی کوششوں کو سراہا۔جائزہ اجلاس کے دوران مرکزی وزیر کو ایمز اونتی پورہ میں بنیادی ڈھانچے کی تعمیر، طبی آلات اور فرنیچر کی خریداری، تدریسی عملے اور دیگر ملازمین کی بھرتی نیز طبی اور تعلیمی سرگرمیاں شروع کرنے کے لیے کیے جا رہے انتظامات کے بارے میں تفصیلی جانکاری فراہم کی گئی۔اجلاس کو بتایا گیا کہ ایمز اونتی پورہ کی تعمیر کا کام آخری مراحل میں داخل ہوچکا ہے اور تمام اہم عمارتوں کی تعمیر مکمل کرلی گئی ہے۔ اس موقع پر جگت پرکاش نڈا نے متعلقہ حکام کو ہدایت دی کہ منصوبے کو ترجیحی بنیادوں پر آگے بڑھایا جائے اور باقی ماندہ تعمیراتی کام مارچ 2027 تک ہر صورت مکمل کیے جائیں۔مرکزی وزیر کو عمارتوں کی مرحلہ وار تکمیل اور انہیں متعلقہ انتظامیہ کے حوالے کرنے کے منصوبے سے بھی آگاہ کیا گیا۔ بتایا گیا کہ پہلے مرحلے کے تحت او پی ڈی رجسٹریشن بلاک، او پی ڈی بلاک، رہائشی عمارتوں اور مخصوص ہاسٹلوں کی تعمیر مکمل ہوچکی ہے جبکہ ان عمارتوں میں موجود سامان اور دیگر اثاثوں کی تصدیق اور باضابطہ حوالگی کا عمل جاری ہے۔ اس کے علاوہ تعلیمی، انتظامی، اسپتال، رہائشی اور ہاسٹلوں سے متعلق باقی ماندہ بنیادی ڈھانچے کی تعمیر بھی مرحلہ وار انجام دی جارہی ہے۔ادارے کو جلد فعال بنانے کی ضرورت پر زور دیتے ہوئے مرکزی وزیر نے ایچ آئی ٹی ای ایس (HITES) اور ایمز اونتی پورہ کے ایگزیکٹو ڈائریکٹر کو باہمی تال میل کے ساتھ کام کرنے اور طبی آلات، او پی ڈی کے لیے ضروری مشینری، لیبارٹری کے سازوسامان اور طبی و انتظامی فرنیچر کی خریداری کے عمل میں تیزی لانے کی ہدایت دی۔ انہوں نے واضح کیا کہ او پی ڈی خدمات شروع کرنے کے لیے درکار تمام ضروری آلات اور دیگر سازوسامان کی خریداری ترجیحی بنیادوں پر مکمل کی جانی چاہیے۔اجلاس کو بتایا گیا کہ 180 طبی آلات کی خریداری کے لیے 59.41 کروڑ روپے کی منظوری دی جاچکی ہے، جن میں سے 140 آلات کے لیے نوٹس آف ایوارڈ بھی جاری کیے گئے ہیں۔ اس کے علاوہ او پی ڈی آلات، لیبارٹری فرنیچر اور طبی و انتظامی فرنیچر کی خریداری کا عمل بھی مختلف مراحل میں جاری ہے۔مرکزی وزیر نے ایمز میں طبی خدمات شروع کرنے سے متعلق تیاریوں کا جائزہ لیتے ہوئے ہدایت دی کہ آلات، تشخیصی سہولیات، افرادی قوت اور دیگر انتظامی ضروریات سمیت تمام لازمی انتظامات خدمات کے آغاز سے قبل مکمل کیے جائیں۔حکام نے اجلاس کو بتایا کہ ایمز اونتی پورہ میں بیرونی مریضوں کے شعبے (او پی ڈی) کی خدمات دسمبر 2026 سے قبل شروع کرنے کا ہدف مقرر کیا گیا ہے، جبکہ داخل مریضوں کے شعبے (آئی پی ڈی) کی خدمات جولائی 2027 میں شروع کرنے کی تجویز ہے۔ تاہم اس کا انحصار ضروری بنیادی ڈھانچے اور دیگر انتظامی و عملیاتی انتظامات کی تکمیل پر ہوگا۔اسی طرح ایمز میں تعلیمی سرگرمیاں اور ایم بی بی ایس کی کلاسیں تعلیمی سیشن 2027-28کے تحت جون اور جولائی 2027 میں شروع کرنے کی تجویز ہے۔ اس طرح ادارے میں طبی خدمات کے ساتھ ساتھ میڈیکل تعلیم کا آغاز بھی مرحلہ وار عمل میں لایا جائے گا۔بھرتی کے عمل کا جائزہ لیتے ہوئے مرکزی وزیر نے ایگزیکٹو ڈائریکٹر اور ادارے کی ٹیم کی کوششوں کو سراہا اور ہدایت دی کہ تدریسی عملے کی بھرتی کے عمل میں تیزی لائی جائے تاکہ اہل اور تجربہ کار فیکلٹی جلد دستیاب ہوسکے۔ انہوں نے غیر تدریسی اسامیوں پر بھرتی اور او پی ڈی سمیت دیگر طبی خدمات کو فعال بنانے کے لیے درکار افرادی قوت کی دستیابی یقینی بنانے پر بھی زور دیا۔اجلاس کو مزید بتایا گیا کہ وزارت صحت نے او پی ڈی اور اس سے منسلک خدمات کو فعال بنانے کے لیے ضروری افرادی قوت کی خدمات حاصل کرنے کی منظوری دے دی ہے۔ اس منصوبے کے تحت مختلف زمروں میں مجموعی طور پر 652 اسامیوں پر عملہ تعینات کرنے کی تجویز ہے، جن میں 150 سکیورٹی اہلکار بھی شامل ہیں۔ اس کے علاوہ اسپتال کے اٹینڈنٹس، صفائی ستھرائی کے عملے اور دیگر ضروری ملازمین کی خدمات بھی حاصل کی جائیں گی۔مرکزی وزیر نے ادارے کی مجموعی تیاریوں اور معاون انتظامات کا بھی جائزہ لیا، جن میں کیمپس کی سکیورٹی، ٹرانسپورٹ رابطے، ویب سائٹ کی تیاری اور مختلف اداروں کے ساتھ عملیاتی تعاون شامل ہے۔ انہوں نے ایمز اونتی پورہ، سی پی ڈبلیو ڈی، ایچ آئی ٹی ای ایس اور مقامی انتظامیہ کے درمیان مو ¿ثر تال میل قائم رکھنے کی ضرورت پر زور دیا تاکہ سیکورٹی اور دیگر انتظامی مسائل کو بروقت حل کرکے ادارے کے کام کاج کو بلا رکاوٹ یقینی بنایا جاسکے۔جگت پرکاش نڈا نے اس عزم کا اعادہ کیا کہ مرکزی حکومت ملک بھر میں صحت کے بنیادی ڈھانچے کو مستحکم بنانے کے لیے پ ±رعزم ہے۔ انہوں نے کہا کہ ایمز اونتی پورہ کی بروقت تکمیل اور اسے فعال بنانا جموں و کشمیر میں معیاری اعلیٰ طبی سہولیات اور خصوصی علاج معالجے کی دستیابی کو وسعت دینے کی جانب ایک اہم پیش رفت ثابت ہوگی۔انہوں نے مزید کہا کہ اس ادارے کے قیام سے خطے میں طبی تعلیم کو فروغ ملنے کے ساتھ ساتھ صحت کے شعبے میں تربیت یافتہ افرادی قوت اور طبی صلاحیتوں میں بھی اضافہ ہوگا۔ یہ اقدام وزیر اعظم نریندر مودی کے اس ویژن سے ہم آہنگ ہے جس کا مقصد ملک کے ہر شہری تک قابل رسائی اور معیاری طبی سہولیات پہنچانا ہے۔
