حکومت کی جامع ، تیز رفتار ترقی کے عزم کا اعادہ کیا ، 100 بستروں والے گرلز ہوسٹل ، آیوش ڈسپنسری کا بھی افتتاح کیا
کولگام //وزیر برائے صحت و طبی تعلیم ، سماجی بہبود اور تعلیم محترمہ سکینہ ایتو نے کولگام ضلع میں کئی اہم ترقیاتی پروجیکٹوں کا سنگِ بنیاد رکھا اور اہم بنیادی ڈھانچے کو عوام کیلئے وقف کیا ۔ اس موقع پر ایم ایل اے کولگام ایم وائی تاریگامی ، مشن ڈائریکٹر آئی سی ڈی ایس ، ڈائریکٹر آیوش ، اے ڈی سی کولگام ، ضلعی انتظامیہ کے سینئر افسران ، دیگر سیکٹرل افسران اور بڑی تعداد میں مقامی لوگ بھی موجود تھے ۔ جموں و کشمیر میں جامع اور مساوی ترقی کیلئے حکومت کی مسلسل کوششوں کے مطابق وزیر نے یاریکہ ۔ اے ، ڈی ایچ پورہ میں وکست ولیج کا سنگِ بنیاد رکھا ۔ اس موقع پر سکینہ ایتو نے کہا کہ اس فلیگ شپ اقدام کے تحت دیہی انفراسٹرکچر کو بہتر بنایا جائے گا اس کے علاوہ اس گاؤں کو ایک خود انحصار اور پائیدار جگہ میں تبدیل کرنے کیلئے بنیادی سہولیات میں خاطر خواہ اضافہ کیا جائے گا ۔ انہوں نے کہا ’’ حکومت بنیادی ڈھانچے ، تعلیم ، صحت کی دیکھ بھال اور سماجی بہبود میں ہدفی سرمایہ کاری کے ذریعے دیہی تبدیلی کو ترجیح دے رہی ہے ۔ ‘‘ اس کے بعد وزیر نے پبلک ورکس ( آر اینڈ بی ) ڈیپارٹمنٹ کے تحت چیری پورہ ۔ ترینگابل سڑک کی تعمیر اور اپ گریڈیشن کا بھی سنگِ بنیاد رکھا جس کی لاگت تقریباً 2 کروڑ روپے ہے ۔ بعد میں وزیر نے کولگام میں 100 بستروں پر مشتمل گرلز ہوسٹل کا بھی افتتاح کیا جس کا مقصد دور دراز اور پسماندہ علاقوں کی لڑکیوں کی تعلیم تک رسائی کو فروغ دینا ہے ۔ اس موقع پر بات کرتے ہوئے وزیر نے کہا کہ ہوسٹل طالبات کو بااختیار بنانے کی طرف ایک اہم قدم کی نمائندگی کرتا ہے جس سے سکول چھوڑنے کی شرح کو کم کیا جا رہا ہے اور ثانوی اور اعلیٰ ثانوی تعلیم میں اعلیٰ داخلے کی حوصلہ افزائی کی جا رہی ہے ۔ اس دوران سکینہ ایتو نے وووری کھل میں آیوش ڈسپنسری کے ساتھ ساتھ کھل ڈی ایچ پورہ میں ہائر سکینڈری اسکول کی عمارت کا بھی افتتاح کیا ۔ بعد ازاں وزیر نے ارد پورہ کھل کا بھی دورہ کیا اور شہید ولی محمد ایتو میموریل کرکٹ ٹورنامنٹ کے فائنل میچ کا مشاہدہ کیا ۔ انہوں نے چیمپین اور رنر اپ ٹیموں میں ٹرافیاں بھی تقسیم کیں ، ساتھ ہی ٹورنامنٹ کے دیگر اعلیٰ کارکردگی کا مظاہرہ کرنے والوں میں تمغے بھی تقسیم کئے ۔
