گالے/آئی اے این ایس//شدید گرمی کے درمیان اسپن کے سخت امتحان کے لیے شبھمن گل کی قیادت میں ہندوستانی ٹیم تیار ہے، جو ہفتہ کو گالے انٹرنیشنل اسٹیڈیم میں دو ٹسٹ میچوں کی سیریزکے پہلے مقابلے میں سری لنکا کا سامنا کرے گی۔ یہ مقابلہ گالے کے تاریخی میدان کے لیے بھی ایک اہم سنگ میل ہوگا، جہاں یہ 50واں ٹسٹ میچ کھیلا جائے گا۔ تاہم، اس خوبصورت ساحلی میدان کے پس منظر میں دونوں برصغیرکی ٹیموں کے لیے ورلڈ ٹسٹ چمپئن شپ (ڈبلیو ٹی سی) میں بقاکی دوڑ بھی جاری ہے۔ نیوزی لینڈ اور جنوبی افریقہ کے خلاف اپنے ہی گھر میں ناکامیوں کے بعد ڈبلیو ٹی سی کی درجہ بندی میں پانچویں مقام پر موجود ہندوستان اس وقت مشکل صورتحال سے دوچار ہے۔ ٹسٹ کرکٹ میں ہندوستان کی طویل عرصے سے قائم ساکھ کو دھکا پہنچا ہے اور ہیڈ کوچ گوتم گمبھیر پر ٹیم کی ریڈ بال کارکردگی کو دوبارہ مضبوط بنانے کا دباؤ بھی بڑھ گیا ہے۔ شبھمن گل کی قیادت والی ٹیم کے لیے یہ مقابلہ جیتنا انتہائی اہم ہوگا۔ دوسری جانب چھٹے مقام پر موجود سری لنکا بھی قیمتی ڈبلیو ٹی سی پوائنٹس کے لیے پوری طرح دباؤ میں ہے۔ ہندوستان کے لیے فوری چیلنج ریڈ بال کرکٹ میں میچ پریکٹس کی کمی ہے۔ ٹیم نے 2026 میں اب تک صرف ایک ٹسٹ کھیلا ہے، جو جون میں افغانستان کے خلاف ایک میچ پر مشتمل سیریز تھی۔ اس کے علاوہ دونوں ٹیموں کے درمیان اس فارمیٹ میں بھی طویل عرصے سے مقابلہ نہیں ہوا۔ ہندوستان نے آخری مرتبہ 2017 میں سری لنکا کا ٹسٹ دورہ کیا تھا۔ اسی وجہ سے موجودہ ہندوستانی ٹیم میں کے ایل راہول اور رویندر جڈیجہ کو سری لنکا میں ٹسٹ کرکٹ کھیلنے کا سب سے زیادہ تجربہ حاصل ہے۔ راہول نے 2015 اور2017 کے دوروں میں جبکہ جڈیجہ نے2017 کے دورے میں سری لنکا کے خلاف ٹسٹ کھیلے تھے۔ ہندوستان کو بارش کے امکانات سے بچتے ہوئے شدید گرمی اور رطوبت کا سامنا کرنے کے ساتھ ساتھ کوکابورا گیند کے خلاف اپنی حکمت عملی ترتیب دینی ہوگی، خاص طور پر اس وقت جب گیند قدرے نرم ہوجائے۔ان حالات سے نمٹنے کے لیے ہندوستانی ٹیم 10 دن قبل ہی سری لنکا پہنچ گئی تھی اور کولمبو میں سری لنکا کرکٹ الیون کے خلاف تین روزہ وارم اپ میچ بھی جیتا۔ گالے کی روایتی طور پر سست اور اسپن کے لیے سازگار پچ پر ہندوستان تین اسپنرز کے ساتھ میدان میں اتر سکتا ہے۔ تجربہ کار جڈیجہ اور ممکنہ طور پر کلدیپ یادیو اسپن کی قیادت کریں گے
