سرینگر//وی او آئی//ضلع اودھمپور کے تحصیل مجالتا کے چوے-پنجیاں علاقے میں ہفتہ کی رات دیر گئے ایک سڑک حادثے میں ایک شخص جاں بحق جبکہ تین دیگر شدید زخمی ہو گئے۔ حادثہ ایک ایکو گاڑی کے بے قابو ہو کر سڑک کے کنارے ٹکرا جانے کے باعث پیش آیا۔پولیس ذرائع کے مطابق حادثے میں ملوث گاڑی کا رجسٹریشن نمبر JK14K-3514 ہے، جو قابو کھو بیٹھنے کے بعد سڑک سے نیچے جا گری۔ اس حادثے میں ایک مقامی شخص روی سنگھ ولد پرکاش سنگھ، ساکن چوے-پنجیاں، موقع پر ہی جان کی بازی ہار گیا۔حادثے میں زخمی ہونے والوں کی شناخت نریش سنگھ (22 سال) ولد مہندر سنگھ، راجندر سنگھ (21 سال) ولد گیان سنگھ، اور ہردیو سنگھ (عمر تقریباً 21–22 سال) ولد کنسو رام کے طور پر ہوئی ہے، جو سب اسی علاقے کے رہائشی ہیں۔زخمیوں کو فوری طور پر علاج کے لیے بلاور اسپتال منتقل کیا گیا، جہاں ان کی حالت پر قریبی نظر رکھی جا رہی ہے۔ پولیس نے واقعے کا نوٹس لیتے ہوئے مزید تحقیقات شروع کر دی ہیں تاکہ حادثے کی اصل وجوہات معلوم کی جا سکیں۔مقامی لوگوں نے علاقے میں بار بار پیش آنے والے سڑک حادثات پر تشویش کا اظہار کرتے ہوئے انتظامیہ سے مطالبہ کیا ہے کہ سڑکوں کی مرمت کی جائے اور حفاظتی اقدامات کو بہتر بنایا جائے تاکہ مستقبل میں ایسے واقعات سے بچا جا سکے۔
