سری نگر//چیف سیکرٹری اَتل ڈولو نے اِنتظامی سیکرٹریوں کی ایک اعلیٰ سطحی میٹنگ کی صدارت کی جس میں محکموں میں بھرتی کے قواعد(آر آر)کی تجدید کی صورتحال اور سرکاری ملازمین کے لئے محکمانہ ترقیاتی کمیٹیوں (ڈِی پی سی) کے اِنعقاد میں ہونے والی پیش رفت کا جائزہ لیا۔دورانِ میٹنگ چیف سیکرٹری نے گزیٹیڈ اور ماتحت سروسزسے متعلق بھرتی قواعد کا محکمہ وار تفصیلی جائزہ لیا اوراِنتظامی ضروریات اور تکنیکی ترقی کے پیش نظر ان کی بروقت نظرثانی کی ضرورت پر زور دیا۔اُنہوں نے کہاکہ گزشتہ برسوں کے دوران طرزِ حکمرانی اور عوامی خدمات کی فراہمی میں نمایاں تبدیلی آئی ہے، محکمانہ ڈھانچے کو عصری ضروریات کے ساتھ ہم آہنگ کرنے کی اہمیت پر زور دیا۔ اُنہوں نے وقت کے ساتھ غیر ضروری ہو چکی اَسامیوں کی نشاندہی اور محکموں کے مؤثر کام کاج کے لئے اہم عہدوں کو مضبوط کرنے کی ضرورت پر بھی زور دِیا۔چیف سیکرٹری نے اس عمل کو منظم انداز میں آگے بڑھانے کے لئے کمشنر سیکرٹری اے آر آئی اینڈ ٹریننگز محکمہ کی کی قیادت میں ایک بنیادی ٹیم تشکیل دینے کی ہدایت دی جس میں جنرل ایڈمنسٹریشن ڈیپارٹمنٹ (جی اے ڈِی)، محکمہ خزانہ، محکمہ قانون اور متعلقہ محکموں کے نمائندے شامل ہوں گے۔ یہ ٹیم آنے والے ہفتوں میں محکمانہ کیڈروں اور اَفرادی قوت کی ضروریات کا جامع جائزہ لے گی تاکہ سرکاری محکموں میںہیومن ریسورسز کا بہترین اِستعمال یقینی بنایا جا سکے۔اُنہوں نے مزید کہا کہ انتظامی کارکردگی کو بڑھانے، ملازمین کے کیریئر میں شفاف ترقی کو یقینی بنانے اور جدید طرز ِحکمرانی کے تقاضوں کے مطابق قابلیت رکھنے والی ہنر مند اَفرادی قوت کو شامل کرنے کے مواقع پیدا کرنے کے لئے اَپ ڈیٹ کردہ بھرتی کے قواعد ضروری ہیں۔ اُنہوں نے تمام محکموں پر زور دیا کہ وہ مقررہ وقت کے اندر اپنے بھرتی کے قواعد پر نظر ثانی اور حتمی شکل دینے کے عمل کو تیز کریں۔چیف سیکرٹری نے محکمانہ ترقیاتی کمیٹیوں کی صورتحال کا جائزہ لیتے ہوئے اِس بات پر زور دیا کہ ملازمین کی پیشہ ورانہ ترقی اور اَفرادی قوت کے حوصلہ برقرار رکھنے کے لئے ڈی پی سیز کا بروقت اور باقاعدہ اِنعقاد ضروری ہے۔ اُنہوں نے تمام محکموں کو رُکاوٹیں دور کرنے اور اہل ملازمین کو بلاتاخیر ترقی دینے کی ہدایت دِی۔میٹنگ میں ملٹی ٹاسکنگ سٹاف (ایم ٹی ایس) کی بھرتی کے لئے مطلوبہ فریم ورک اور سکل سیٹس پر بھی غوروخوض کیا گیا۔ اِس معاملے کی جانچ اور مناسب سفارشات مرتب کرنے کے لئے جنرل ایڈمنسٹریشن ڈیپارٹمنٹ کی طرف سے قائم کردہ کمیٹی کے کام کے حوالے سے بھی تبادلہ خیال ہوا۔ایڈیشنل چیف سیکرٹری فائنانس ڈیپارٹمنٹ شیلندر کمار نے ملٹی ٹاسکنگ سٹاف (ایم ٹی ایس) کی بھرتی پر بات چیت کے دوران تمام اِنتظامی سیکرٹریوں کو مشورہ دیا کہ وہ اپنے متعلقہ محکموں میں ایم ٹی ایس کے اہلکاروں سے مطلوبہ مہارتوں اور قابلیت کی نوعیت کو واضح طور پر بیان کریں۔کمشنر سیکرٹری جنرل ایڈمنسٹریشن ڈیپارٹمنٹ، ایم راجو نے میٹنگ کو مختلف کیڈروں میں مختلف محکموں کی طرف سے منعقد کی گئی ڈی پی سیز اور اکتوبر 2025 سے ترقی پانے والے ملازمین کی تعداد کے بارے میں آگاہ کیا۔ اُنہوں نے یہ بھی بتایا کہ زیر اِلتوأ عدالتی مقدمات اور سنیارٹی لسٹوں کو اَپ ڈیٹ کرنے میں تاخیر جیسے عوامل کئی محکموں میں ترقیوں کے عمل میں رُکاوٹ بن رہے ہیں۔اِس سے قبل کمشنر سیکرٹری اے آر آئی اینڈ ٹریننگز محکمہ شبنم کاملی نے محکمہ میں زیر غور بھرتی قواعد کی صورتحال پر تفصیلی پرزنٹیشن دی۔ اُنہوں نے میٹنگ کو ان معاملات کے بارے میں آگاہ کیا جنہیں مشاہدات کی تعمیل کے لئے متعلقہ محکموں کو واپس بھیجا گیا تھا اور متعلقہ محکموں پر زور دیا کہ وہ جلد از جلد نظرثانی شدہ تجاویز کو جلد از جلد دوبارہ پیش کریں۔میٹنگ میں بھرتی قواعد کی پروسسنگ کے لئے تیار کئے گئے آن لائن پورٹل کے کام کاج کا بھی جائزہ لیا گیا۔ بتایا گیا کہ کئی محکمے پہلے ہی اس پورٹل کے ذریعے اَپنی تجاویز جمع کرچکے ہیں اور اس کے آپریشن میں درپیش تمام تکنیکی مسائل کامیابی کے ساتھ حل کئے گئے ہیں۔میٹنگ کو مزید بتایا گیا کہ پورٹل کے مؤثر اِستعمال میں سہولیت فراہم کرنے اور حکومت بھر میں بھرتی کے قوانین کی ہموار، شفاف اور وقتی اپ ڈیٹ کو یقینی بنانے کے لئے محکمانہ افسران کے لئے استعداد کار بڑھانے کے وسیع پیمانے پر اَقدامات کئے گئے ہیں۔چیف سیکرٹری نے ہیومن ریسورسز کے اِنتظام کو جدید خطوط پر اُستوار کرنے، سروس ڈھانچوں کو مزید مؤثر بنانے اور ملازمین کو بروقت ترقیوں کی فراہمی کے حکومت کے عزم کا اعادہ کرتے ہوئے کہا کہ ان اقدامات سے انتظامی کارکردگی میں اضافہ ہوگا اور عوام کو بہتر خدمات فراہم کی جا سکیں گی۔
