معاشرے میں مثبت تبدیلی لانے کیلئے قوم کو مضبوط بنانے کا جذبہ اہم / وزیر اعظم مودی
سرینگر /این این بی // وزیر اعظم نریندر مودی نے راشٹریہ سویم سیوک سنگھ کے سرسنگھ چالک ڈاکٹر موہن بھاگوت کے ناگپور میں منعقدہ صدی سالہ وجے دشمی تقریب سے خطاب کو انتہائی متاثر کن اور حوصلہ افزا قرار دیتے ہوئے قومی ترقی، سماجی اتحاد، خود انحصاری اور قوم کی تعمیر کے حوالے سے ان کے خیالات کی ستائش کی ہے۔نیشنل نیوز بیورو ( این این بی ) کے مطابق وزیر اعظم نریندر مودی نے سوشل میڈیا پلیٹ فارم ایکس پر اپنے پیغام میں کہا کہ ڈاکٹر موہن بھاگوت نے اپنے خطاب میں متعدد اہم امور پر تفصیل سے روشنی ڈالی۔ انہوں نے بالخصوص قومی ترقی، سماجی اتحاد، خود انحصاری اور معاشرے کے کردار کو مضبوط بنانے کی ضرورت پر زور دیا۔وزیر اعظم نے کہا کہ بھاگوت کے خطاب کا ایک اہم پہلو ’سیوا‘ یعنی خدمت اور قوم کی تعمیر کے لیے عزم تھا، جو ہر آر ایس ایس سویم سیوک کی زندگی کا لازمی حصہ ہے۔ انہوں نے کہا کہ معاشرے میں مثبت تبدیلی لانے کے لیے خدمت، ذمہ داری اور قوم کو مضبوط بنانے کا جذبہ نہایت اہم ہے۔ وزیر اعظم مودی نے ڈاکٹر بھاگوت کی جانب سے ’پنچ پریورتن‘ کا ذکر کیے جانے کو بھی اہم قرار دیا اور کہا کہ یہ تصورات معاشرے میں مثبت سماجی تبدیلی لانے میں بامعنی کردار ادا کر سکتے ہیں۔انہوں نے کہا کہ ہندوستان کی طاقت اس کی سماجی اور ثقافتی بنیادوں میں مضمر ہے اور ملک کو متحد اور مضبوط بنانے کے لیے معاشرے میں خود آگاہی، قومی یکجہتی اور ذمہ داری کے احساس کو مزید فروغ دینے کی ضرورت ہے۔خیال رہے کہ آر ایس ایس کی صدی سالہ وجے دشمی تقریبات کے دوران ناگپور کے ریشم باغ گراو ¿نڈ میں خطاب کرتے ہوئے ڈاکٹر موہن بھاگوت نے گزشتہ 100 برسوں کے دوران تنظیم کی سرگرمیوں اور اس کے بنیادی مقاصد پر روشنی ڈالی۔ انہوں نے کہا کہ آر ایس ایس نے طویل عرصے سے معاشرے میں خود آگاہی پیدا کرنے، ہندوستان کی وحدت اور شناخت کو مضبوط بنانے کی کوشش کی ہے۔ وزیر اعظم مودی نے آر ایس ایس کے یوم تاسیس کے موقع پر سویم سیوکوں کو مبارکباد دیتے ہوئے تنظیم کے سو سالہ سفر میں خدمت، قوم کی تعمیر اور سماجی ہم آہنگی کے لیے کام کرنے والوں کو بھی خراج عقیدت پیش کیا۔ انہوں نے کہا کہ بے شمار سویم سیوکوں نے فرض شناسی، لگن اور ’قوم سب سے پہلے‘ کے جذبے کے ساتھ معاشرے کی بہتری کے لیے کام کیا ہے۔انہوں نے امید ظاہر کی کہ خدمت اور قوم کے تئیں وابستگی کا یہی جذبہ آنے والے وقت میں بھی ملک کی ترقی اور استحکام کو مزید مضبوط بنانے میں معاون ثابت ہوگا۔
