ہائی کورٹ اسٹاف ویلفیئر ایسوسی ایشن نے خیرمقدم کیا
سرینگر// یو این ایس / ئی کورٹ اسٹاف ویلفیئر ایسوسی ایشن نے جمعہ کے روز ہائی کورٹ کے چیف جسٹس ڈاکٹر پشپیندر سنگھ بھاٹی کا عہدہ سنبھالنے پر گرمجوشی سے خیرمقدم کیا۔ہائی کورٹ اسٹاف ویلفیئر ایسوسی ایشن کے صدر سید انور شاہین کی قیادت میں ایک وفد نے چیف جسٹس سے ملاقات کی اور رجسٹری و انتظامی عملے کی جانب سے انہیں عہدہ سنبھالنے پر دلی مبارکباد پیش کی۔کشمیری روایات اور مہمان نوازی کے تحت ایسوسی ایشن کی جانب سے چیف جسٹس کو پھولوں کا گلدستہ، روایتی لباس اور کشمیری شال پیش کی گئی۔ملاقات کے دوران ایسوسی ایشن کے نمائندوں نے نئی قیادت کے ساتھ مکمل تعاون اور یکجہتی کا اظہار کیا۔ انہوں نے اس عزم کا بھی اظہار کیا کہ ہائی کورٹ کے انتظامی امور کو مؤثر، منظم اور بہتر انداز میں چلانے کے لیے اسٹاف اپنا بھرپور کردار ادا کرتا رہے گا۔اس موقع پر ایسوسی ایشن کے صدر سید انور شاہین نے کہا کہ ہائی کورٹ کا عملہ چیف جسٹس کی قیادت اور دوراندیش رہنمائی میں کام کرنے کا منتظر ہے۔ انہوں نے امید ظاہر کی کہ نئی قیادت ملازمین کو مسلسل ادارہ جاتی تعاون فراہم کرے گی اور ہائی کورٹ کے انتظامی نظام کو مزید مضبوط بنانے میں اہم کردار ادا کرے گی۔چیف جسٹس ڈاکٹر پشپیندر سنگھ بھاٹی نے اسٹاف ویلفیئر ایسوسی ایشن کی جانب سے کیے گئے پرتپاک خیرمقدم اور نیک جذبات کو سراہا۔ انہوں نے عدالتی نظام کی مؤثر کارکردگی میں عدالتی ملازمین اور رجسٹری عملے کے اہم کردار کا اعتراف کیا۔چیف جسٹس نے کہا کہ عدالتی ادارے کی کارکردگی کو برقرار رکھنے اور عوام کو بروقت انصاف کی فراہمی میں رجسٹری اور دیگر ملازمین کا کردار انتہائی اہم ہے۔ملاقات خوشگوار ماحول میں اختتام پذیر ہوئی۔ اس موقع پر ایسوسی ایشن کے ارکان نے چیف جسٹس ڈاکٹر پشپیندر سنگھ بھاٹی کے لیے نیک خواہشات کا اظہار کرتے ہوئے ان کے کامیاب اور شاندار دورِ ملازمت کی دعا کی۔
