طلب زیادہ ،مگر پیداوار کم ،سیب صنعت کو اس بار بھی نقصانات کا احتمال

ناموافق موسمی صورتحال نے کام بگاڑ دیا ،میوہ بیوپاری پریشانیوں میں مبتلاء

سری نگر//حالیہ مہینوں میں خراب موسم اور بعض بیماریوں کے پھیلنے کی وجہ سے کشمیر میں سیب کی پیداوار بری طرح متاثر ہورہی ہے جس سے کسانوں میںپریشانیاں لاحق ہوگئی ہیں ۔وادی کے مختلف علاقوں سے سیب کے کئی کاشتکاروں نے بتایا کہ روایتی میوہ اقسام سے وابستہ لوگ بہت زیادہ پریشان ہیں کیونکہ ان کی پیداواربہت کم ہے۔ ٹی ای این کے مطابق اگرچہ ابھی سیب اور دیگر میوہ جات کی فصل پوری طرح سے تیار ہوکر مارکیٹ کیلئے روانہ نہیں ہوئی ہے تاہم ابتدائی تخمینوں سے یہ بات سامنے آئی ہے کہ رواں برس سیب کی پیداوار سابقہ برسوں کے مقابلے میں بہت کم ہے ۔سوپورکے ایک سیب کاشتکار عبدالرشیدنے بتایا کہ ان کے پاس گزشتہ سال سیب کے تقریباً 1000 ڈبے تھے اور اس سال یہ بمشکل 400 سے 500 کے قریب ہوں گے۔ کم پیداوار ہونے کے باوجود سیب کا سائز بھی چھوٹا ہے۔ انہوں نے کہا کہ عام طور پر جب بھی درخت پر پھل کم ہوتے ہیں تو اس کا سائز بڑا رہتا ہے لیکن اس سال صورتحال مختلف ہے کیونکہ پیداوار کم ہونے کے ساتھ ساتھ چھوٹے سائز کا بھی ہے۔ایک اور کاشتکار محمد عباس نے بتایا کہ موسم بہار میں سیب کے ابتدائی مرحلے میں مسلسل بارشیں ہوئیں اور پودوں کو فوٹو سنتھیسز کے لیے مطلوبہ سورج کی روشنی نہیں ملی۔ انہوں نے کہا کہ اس کے نتیجے میں پیداوار کم ہوئی اور قبل از وقت پھل پیدا ہوئے۔انہوں نے کہا کہ بعد ازاں جولائی میں ہونے والی بے وقت بارشوں سے سکیبکی بیماری پھیل گئی جس نے سیب کی کوالٹی کو مزید متاثر کیا۔ تاہم، انہوں نے مزید کہا کہ گزشتہ دو ماہ میں گرم آب و ہوا نے سیب کی افزائش میں کافی حد تک مدد کی ہے۔کاشتکاروں کا کہنا تھا کہ درختوں کو تمام غذائی سپلیمنٹس اور یہاں تک کہ کچھ پلانٹ گروتھ ریگولیٹرز (PGRs) بھی فراہم کیے گئے تھے لیکن اس سے مطلوبہ نتائج برآمد نہیں ہوئے۔ انہوں نے مزید کہا کہ بہت سے درختوں پر پھلوں کی اچھی فیصد پوری جسامت تک نہیں پہنچی جو تشویشناک ہے۔کشمیر ویلی فروٹ گروورز کم ڈیلرز یونین کے چیئرمین بشیر احمد بشیر نے بتایا کہ اگرچہ سیب کی اچھی مانگ ہے لیکن پیداوار کم ہے۔انہوں نے کہا کہ موسم کے اتار چڑھاؤ کی وجہ سے پھل کا سیٹ، پیداوار، معیار اور سائز متاثر ہوا ہے۔ اس سال اب تک، حکومت نے سیب سے لدے ٹرکوں کی پریشانی سے پاک نقل و حرکت کو یقینی بنایا ہے۔ لیکن واحد مسئلہ کم پیداوار کے ساتھ کم معیار کے پھل کا ہے۔ انہوں نے کہاکہ اس سال معیاری پھل رکھنے والوں کو اچھی خاصی کمائی ہوگی کیونکہ اس کی مانگ اچھی ہے۔باغبانی کے محکمے کے حکام نے تسلیم کیا کہ خراب موسم اور خارش کی وبا نے سیب کی پیداوار اور معیار کو نمایاں طور پر متاثر کیا۔ ان کا کہنا تھا کہ فصل کی کٹائی کا عمل مکمل ہونے کے بعد انہیں فصل کی صحیح کمی کا پتہ چل جائے گا۔قابل ذکر بات یہ ہے کہ کشمیر ہر سال اوسطاً 20 لاکھ میٹرک ٹن سے زیادہ سیب پیدا کرتا ہے، جو کہ کچھ سالوں میں 25 لاکھ میٹرک ٹن تک پہنچ جاتا ہے۔جموں و کشمیر میں 2017 کے اقتصادی سروے میں کہا گیا ہے کہ کشمیر کی نصف آبادی براہ راست یا بالواسطہ طور پر سیب کی صنعت پر منحصر ہے اور3.5لاکھ ہیکٹر سے زیادہ سیب کی کاشت کے تحت ہے۔تقریباً9.5 فیصد حصہ کے ساتھ باغبانی گھریلو پیداوار میں ایک لازمی شراکت دار ہے۔