جے پور//جموں و کشمیر منرلز لمٹیڈ نے جیمز اینڈ جیولری ایکسپورٹ پروموشن کونسل ( جی جے ای پی سی ) جے پور کے تعاون سے جی جے ای پی سی کنونشن سنٹر جے پور میں دنیا کے مشہور کشمیر بلیو سیفائر کے خصوصی ڈسپلے کے ساتھ ایک مشاورتی میٹنگ کا انعقاد کیا ۔ اس موقع پر سیکرٹری کان کنی ڈاکٹر رشمی سنگھ مہمان خصوصی تھیں جبکہ ڈائریکٹر جیالوجی اور کان کنی راکیش مگوترا ، منیجنگ ڈائریکٹر جے اینڈ کے معدنیات لمٹیڈ وکرم گپتا کے علاوہ کارپوریشن کے دیگر افسران نے اس تقریب میں شرکت کی ۔ اس موقع پر خطاب کرتے ہوئے ڈاکٹر رشمی سنگھ نے کہا کہ حکومت جموں و کشمیر بتدریج یو ٹی میں مختلف معدنیات کی تلاش کیلئے کام کر رہی ہے ۔ اس سمت میں فی الحال ایم ای سی ایل ( حکومت ہند پی ایس یو ) کے ذریعہ پاڈر سیفائر کی کانوں کی تلاش کی جا رہی ہے ۔ انہوں نے مزید کہا کہ حکومت کی جانب سے لیتھیم وغیرہ جیسے نایاب زمینی عناصر کی تجارتی تلاش اور استحصال کیلئے تمام ممکنہ اقدامات کئے جا رہے ہیں ۔ اجلاس میں قیمتی پتھروں کی تجارت سے وابستہ ممبران کے ایک بڑے اجتماع نے شرکت کی ۔ کنوینر سی جی ایس پینل جی جے ای پی سی مہندر اگروال نے بریف کیا کہ جیم اینڈ جیولری کا شعبہ ہندوستان کی جی ڈی پی میں تقریباً 7 فیصد کا حصہ ڈال رہا ہے اس طرح اس نے خود کو ملک کے ایک اہم اقتصادی شعبے کے طور پر قائم کیا ہے ۔ جی جے ای پی سی نے جموں و کشمیر میں سرمایہ کاری کو راغب کرنے کیلئے اس طرح کے بیداری پروگرام کے انعقاد کیلئے حکومت جموں و کشمیر کے ساتھ مزید تعاون کرنے پر بھی آمادگی ظاہر کی ۔ ممبران نے جے اینڈ کے منرلز لمٹیڈ کے حکام کی طرف سے لائے گئے کچے نیلم کے کچھ نمونوں کے معیار کی جانچ کی ۔ نیلم کی اس طرح کی نمائش نے نہ صرف نیلم کے ممکنہ خریداروں میں بیداری پیدا کی بلکہ وسیع تر تشہیر ، نیٹ ورکنگ ، ڈیٹا بیس بنانے میں بھی مدد کی جس سے آئندہ ای نیلامی میں نیلم /کورنڈم کی زیادہ سے زیادہ مارکیٹ ایبلٹی میں مدد ملے گی ۔ کارپوریشن کے ذریعے نیلم پتھر خریدنے کے خواہشمند لوگوں کا ڈیٹا بیس بھی برقرار رکھا گیا تھا ۔
