جموں //محکمہ زراعت کی پیداوار کے ایڈیشنل چیف سیکرٹری ( اے سی ایس ) اتل ڈولو نے آج چکروئی آر ایس پورہ میں تیار کی جانے والی میگا فروٹ پلانٹ نرسری کا دورہ کیا ۔ یہ نرسری محکمہ کی تاریخ میں اپنی نوعیت کی پہلی خصوصی طور پر اعلیٰ کثافت والے پھلوں کے پودوں کی پیداوار کیلئے ہو گی جو جموں صوبے کے کسانوں کی کافی حد تک ضرورت کو پورا کرے گی ۔ دورے کے دوران ایڈیشنل چیف سیکرٹری نے میگا فروٹ پلانٹ نرسری چکروئی کی ترقی کیلئے جدید ترین تکنیکوں کے ساتھ تیار کردہ پانی کے درست استعمال کیلئے نئے تعمیر شدہ خود کار مائیکرو اریگیشن سسٹم کا معائینہ کیا ۔ انہوں نے کہا کہ نرسری جموں و کشمیر کے یو ٹی میں سب سے بڑی نرسریوں میں سے ایک ہے ، جموں ڈویژن کے علاقوں کے کسانوں کی ضروریات کو پورا کر سکتی ہے ۔ مسٹر ڈولو نے محفوظ کاشت کے ڈھانچے کا بھی دورہ کیا جن میں ہائی ٹیک پولی ہاوس ، کیڑے پروف نیٹ ہاوس ، اسکرین ہاوس اور نرسری کے دیگر حصے شامل ہیں ۔ انہوں نے افسران پر زور دیا کہ وہ کسان برادری کی بہتر طریقے سے خدمت کرنے کیلئے جوش اور لگن کے ساتھ کام کریں ۔ انہوں نے کم سے کم وقت میں میگا نرسری کو سائنسی خطوط پر استوار کرنے میں محکمہ کی جانب سے کئے گئے کام کو سراہا ۔ قبل ازیں ڈائریکٹر ہارٹیکلچر جموں رام سیوک نے میگا نرسری میں 805 کنال کے رقبے پر محیط جدید خطوط پر اس کی ہمہ گیر ترقی کیلئے کئے جا رہے ترقیاتی کاموں کے بارے میں بتایا ۔
