شہدائے کربلا کی یاد میں گانگو پلوامہ میں حسینیؑ مشاعرہ کا انعقاد

سری نگر// ضلع پلوامہ کی معروف ادبی تنظیم ڈسڑکٹ کلچرل سوسائٹی کی جانب سے مرکزی امام باڑہ ہ گانگوہ پلوامہ میں حسینیؑ مشاعرے کا انعقاد کیا گیا جس میں مختلف اضلاع سے تعلق رکھنے والے سرکردہ شعراء نے شرکت کی اور امام حسین علیہ السلام کے تئیں اپنا منظوم خراج پیش کیا۔تفصیلات کے مطابق ڈسڑکٹ کلچرل سوسائٹی پلوامہ اور اوقاف کمیٹی گانگو کے باہمی اشتراک سے امام باڑہ گانگوہ میں حسینیؑ مشاعرہ کا اہتمام کیا گیا۔ مجلس کا آغاز تلاوت کلام پاک سے ہوا جس کی سعادت شاعر غلام محمد دلشاد کو حاصل ہوئی جبکہ مشتاق مضروب ؔنے نعتِ رسولِ مقبول ﷺپیش کیا۔ تقریب کی صدارت ڈسڑکٹ کلچرل سوسائٹی پلوامہ کے صدر شمس سلیم نے کی اور ایوان صدارت میں مقامی اوقاف کمیٹی گانگوہ کے ممبر حاجی علی محمد ننگرو،وادی کے نامور شاعر، ادیب اور قلمکار عبدل رحمان فدا اور معروف شاعر تنہا شیہل پوری موجود تھے۔وادی کے مختلف اضلاع سے آئے ہوئے شاعروں ،ادیبوں اور قلمکاروں کی ایک بڑی تعداد نے حسینیؑ مشاعرے میں شرکت کرکے شہدائے کربلاؓ کو گلہائے عقیدت پیش کرتے ہوئے کہا کہ امام عالی مقامؓ نے کربلا میں جو عظیم شہادت پیش کی ہے وہ تاقیامت یاد کی جائے گی۔ گانگو علاقے کے نوجوان محمد صادق نے خطبہ استقبالیہ پیش کرکے مہمانوں کا استقبال کیا جبکہ نظامت کے فرائض شاعر غلام محمد دلشاد نے انجام دئے۔مشاعرے میں اعجاز شاہ، سکندر ارشاد،کارساز غلام محمد عبدالرشید پنزگامی، مشتاق مضروب، عبدالرحمان جنگلناری، غلام محمد جنگلناری،جی ایم دلشاد، میر عبدالرحمان، ملک ادریس، محمد یوسف دلدار، جہانگیر ایاز حالی،نثار منظور، غلام محمد شوقین، جاوید مسکین، عبدل رحمان فدا،شمس سلیم،بلال قاصر،غلام محمد نوسوز اور شاکر فاروق کے علاوہ دیگر کئی شعراء نے شرکت کی۔تقریب کو منعقد کرنے کیلئے علاقہ گانگوہ نے احسن انتظامات کئے تھے۔ تقریب کے آخر پر نوجوان سماجی کارکن اور ذرائع ابلاغ سے تعلق رکھنے والے اختر عباس نے تمام مہمانوں کا شکریہ ادا کیا۔