وادی کے دیہی علاقوں میں ناقص بجلی نظام

وادی کے بیشتر دیہی علاقوں میں بجلی کے ناقص نظام سے جہاں عوام کو سخت مشکلات کا سامنا کرنا پڑھ رہا ہے وہیں بجلی کی تر سیلی لائنوں اور کھمبوں کے بوسیدہ ہونے کی وجہ سے لوگوں کے مال وجان کو خطرہ لاحق ہے ۔اس سلسلے میں مقامی لوگوں نے بتایا کہ بجلی کی خستہ حالی اور بے تحاشہ کٹوتی کی وجہ سے مقامی لوگوں کو مشکلات کا سامنا کرنا پڑ رہا ہے ۔انہوں نے کہا کہ بجلی کی ترسیلی لائنوں کو درختوں کے ساتھ باندھا گیا ہے جبکہ بجلی کی ترسیلی لائنیں زمین سے پانچ فٹ کی دوری پر ہیں اور خطرے کے بادل منڈلارہے ہیں لیکن محکمہ پی ڈی ڈی ان بوسیدہ ہوئی ترسیلی لائنوں اور بجلی کھمبوں کی مرمت کرنے کی طرف کوئی دھیان نہیں دے رہا ہے ۔انہوں نے کہا کہ بجلی کی ترسیل کے دوران کسی بھی وقت ان کھمبوں یالائنوں کو زمین پر گرنے کا خطرہ رہتا ہے جس عوام ، راہگیروں و مال مویشوں کو جانی نقصان پہنچناطے ہے ۔انہوں نے کہا کہ محکمہ ہذا بجلی کے عوض غریب عوام سے بطور فیس بھاری رقومات حاصل کرتا ہے لیکن فیس وصولی کے باوجود بھی بجلی کی ترسیلی لائنوں و لکڑی کے بوسیدہ کھمبوں کیلئے متبادل انتظام کرنے میں ناکام ثابت ہورہا ہے ۔انہوں نے کہاکہ نا ہی بجلی سپلائی کا کوئی شیڈول مرتب ہے اور نہ ہی اس کی طرف کوئی توجہ دی جاتی ہے جس کے نتیجے میں لوگوں کو گونا گوں مشکلات کاسامنا کرنا پڑرہا ہے ۔اس سلسلے میں مقامی لوگوں نے محکمہ کے حکام سے جدید طرز پر بجلی کھمبے اور ترسیلی لائنیں نصب کرنے کا مطالبہ کیا ْاور شیڈول کے مطابق فراہم کرنے کی مانگ کی ۔انہوں نے کہا کہ اگر مزید لیت ولعل سے کام لیا تو اس کے نتائج کافی بھیانک ثابت ہونگے جس کی تمام تر زمہ داری محکمہ کے حکام پرعائد ہوگی۔