راجوری، 4 فروری (یو این آئی) جموں و کشمیر کے لیفٹیننٹ گورنر کے مشیر فاروق خان نے کہا کہ سرحدی علاقوں میں کمیونٹی بنکروں کی تعمیر کا کام ترجیحی بنیادوں پر جاری ہے۔
تاہم ان کے بقول بنکر ایک ایسی چیز ہے جس کو راتوں رات بنایا نہیں جا سکتا کیونکہ زیر زمین ہونے کی وجہ سے ان کی تعمیر میں تھوڑا وقت لگ جاتا ہے۔
مشیر فاروق خان نے جمعرات کو یہاں نامہ نگاروں کے سوالات کا جواب دیتے ہوئے کہا: ‘بنکر ایک ایسی چیز ہے جس کو راتوں رات بنایا نہیں جا سکتا۔ سرحدی علاقوں میں تعمیراتی مواد پہنچا کر بنکروں کی تعمیر کا کام جاری ہے۔ بنکروں کو ایک مخصوص طریقے سے تعمیر کیا جاتا ہے’۔
ان کا مزید کہنا تھا: ‘اب تک کافی سارے بنکر بنا دیے گئے ہیں اور کافی ساروں کو بنانے کا سلسلہ جاری ہے۔ ہماری کوشش ہے کہ فوراً سے پیشتر جتنے بھی بنکر بنانے ہیں، ان کی تعمیر مکمل کی جائے۔ ہم نے سکولوں اور طبی مراکز کے نزدیک بھی کمیونٹی بنکر بنانے کی تجویز مرکزی حکومت کو بھیج دی ہے’۔
