جاوید ڈار نے مہا شوراتری کی مبارکباد پیش کی ، جموں و کشمیر میں امن و خوشحالی کی دعا کی

سرینگر//وزیر برائے زراعت ، دیہی ترقی و پنچائتی راج ، کواپریٹو اور الیکشن مسٹر جاوید احمد ڈار نے مہا شوراتری کے مقدس موقع پر جموں و کشمیر کے عوام کو گرمجوشی سے مبارکباد پیش کی ہے ۔ اپنے پیغام میں وزیر نے تمام شہریوں ، بالخصوص کشمیری پنڈت برادری کو جو اس مقدس تہوار ہیرتھ ( مہا شوراتری ) منا رہے ہیں ، دل کی گہرائیوں سے نیک خواہشات کا اظہار کیا ۔ انہوں نے کہا کہ یہ مقدس موقع عقیدت ، ایمان ، ہم آہنگی اور نیکی کی فتح کی علامت ہے ۔ جاوید ڈار نے امید ظاہر کی کہ یہ تہوار یو ٹی بھر میں ہر گھر میں امن ، خوشحالی اور خوشی لے کر آئے گا ۔ انہوں نے زور دیا کہ ایسی تقریبات جموں و کشمیر کی متنوع برادریوں کے درمیان بھائی چارے ، فرقہ وارانہ ہم آہنگی اور باہمی احترام کے رشتوں کو مزید مضبوط کرتی ہیں ۔ انہوں نے لوگوں سے اپیل کی کہ وہ روائتی جوش و جذبے کے ساتھ اس موقع کو منائیں اور اتحاد ، ہمدردی اور سماجی ہم آہنگی کی اقدار کو برقرار رکھیں ۔