ڈائریکٹر انفارمیشن نے ڈی آئی پی آر کے افسران اور ملازمین کو این وی ڈی کا عہد دلایا

جموں//قومی ووٹرز ڈے کی مناسبت سے ڈائریکٹر انفارمیشن اینڈ پبلک ریلیشنز مسٹر نتیش راجورا ( آئی اے ایس ) نے میڈیا کمپلیکس جموں میں ڈائریکٹوریٹ آف انفارمیشن اینڈ پبلک ریلیشنز ( ڈی آئی پی آر ) کے افسران اور ملازمین کو نیشنل ووٹرز ڈے ( این وی ڈی ) کا عہد دلایا۔ اس موقع پر ڈائریکٹر موصوف نے ڈی آئی پی آر کے افسران اور ملازمین کے ساتھ مل کر عہد پڑھا ، جس میں بھارت کے آئین میں درج جمہوری اقدار کی پاسداری ، جمہوریت کے اصولوں کو برقرار رکھنے ، اپنے الیکشن حقوق کو ذمہ داری سے استعمال کرنے اور حق رائے دہی کے عمل میں زیادہ سے زیادہ شمولیت کی حوصلہ افزائی کرنے کا عہد کیا گیا ۔ اس موقع پر خطاب کرتے ہوئے ڈائریکٹر انفارمیشن نے اس سال کے این وی ڈی کے تھیم ’ مائی انڈیا مائی ووٹ ‘ کی اہمیت پر روشنی ڈالی اور کہا کہ یہ تھیم جمہوری اداروں کو مضبوط کرنے اور باخبر اور ذمہ دارانہ ووٹنگ کی اہمیت کے بارے میں آگاہی پیدا کرنے کی عکاسی کرتا ہے ۔ الیکشن ڈیپارٹمنٹ کی سویپ سرگرمیوں کے حوالے سے ڈی آئی پی آر کے کردار پر زور دیتے ہوئے ڈائریکٹر موصوف نے ڈی آئی پی آر کے اہلکاروں پر زور دیا کہ وہ ووٹ کی افادیت اور الیکشن میں جامع شرکت کو فروغ دینے میں اپنا فعال کردار ادا کریں ۔