کپواڑہ// کمشنر سیکرٹری سائنس اینڈ ٹیکنالوجی سوربھ بھگت نے آج ٹاؤن ہال کپواڑہ میں حکومت کی عوامی رَسائی اَقدام کے تحت ایک’’ میگا عوامی دربار ‘‘کی صدارت کی جس کا مقصد ضلع میں جاری ترقیاتی سرگرمیوں کا جائزہ لینے کے علاوہ عوامی شکایات کا جائزہ لینا ہے۔عوامی دربار کے دوران کمشنر سیکرٹری نے شرکأ سے تفصیلی بات چیت کی جنہوں نے اُنہیں اَپنے متعلقہ علاقوں سے متعلق مسائل سے آگاہ کیا۔ اُنہوں نے ان سے اَپنے علاقوں میں سرکاری سکیموں کی عمل آوری کے بارے میں رائے بھی طلب کی اور اِن اَقدامات کے ان کی زندگی پر پڑنے والے اثرات کے بارے میں دریافت کیا۔کمشنرسیکرٹری نے عوامی دربار کے دوران عوام کی طرف سے اُٹھائے گئے مسائل کا جواب دیتے ہوئے انہیں یقین دِلایا کہ تمام مسائل کو متعلقہ حکام کے ساتھ جلد حل کرنے کے لئے اٹھایا جائے گا۔اُنہوں نے فوری کاررِوائی کا یقین دلاتے ہوئے یقین دِلایا کہ وہ تمام عوامی مطالبات کو متعلقہ حکام کے سامنے اُٹھائیں گے۔مہمان خصوصی نے عوامی دربار کی اہمیت پر روشنی ڈالتے ہوئے کہا کہ یہ عوامی رابطہ پروگرام اِنتظامیہ اور عوام کے درمیان ایک پُل کا کام کرتے ہیں جس سے ضلع میں ترقی و خوشحالی کی راہ ہموار ہوتی ہے۔ کمشنرسیکرٹری کے افسران، روٹیشن کی بنیاد پر لوگوں کی دہلیز پر پہنچ کر ان کی مخصوص ترقیاتی ضروریات اور خواہشات کا تجزیہ کرتے ہیں۔کمشنر سیکرٹری نے کہا کہ ضلع کپواڑہ پہلا ضلع ہے اور اس کے علاوہ یہ اسپریشنل ضلع ہے جو تیز رفتاری سے ترقی اور پیش رفت کا مشاہدہ کر رہا ہے اور ہمیں اُمید ہے کہ یہ نہ صرف جموںوکشمیر یوٹی بلکہ پورے ملک میں بہترین کارکردگی کا مظاہرہ کرنے والا ضلع بن جائے گا۔اُنہوں نے اِی۔ گورننس کی وضاحت کرتے ہوئے کہا کہ 1,200 آن لائن سرکاری خدمات ڈیجیٹل تبدیلی، شہریوں کی مصروفیت کو بہتر بنانے، رسائی، کارکردگی اور شہریوں کے لئے سہولیت کو بڑھانے میں اہم کردار ادا کر رہی ہیں۔ یہ خدمات شہریوں کو کسی بھی وقت، کہیں بھی سرکاری خدمات تک رَسائی حاصل کرنے کی اِجازت دیتی ہیں جس کے لئے فزیکل دفاتر کا دورہ کرنے کی ضرورت نہیں ہوتی ہے۔اِسی طرح ایل جی گریوینس سیل لوگوں کے مسائل کو حل کرنے میں اہم کردار ادا کرتا ہے اور ان کی شکایات اور مسائل کو ایک ماہ کے اندر جوابدہ اور مؤثر انداز میں حل کرنے کے لئے ایک مخصوص پلیٹ فارم فراہم کرتا ہے۔ شفاف اِنتظامیہ نے اعتماد، شفاف اور مؤثر حکمرانی کو فروغ دیا ہے۔کمشنر سیکرٹری نے کمیونٹی کی بڑی تعداد میں شرکت پر شکریہ اَد اکرتے ہوئے آن لائن خدمات اور ڈیجیٹلائزیشن کے بارے میں بیداری پیدا کرنے کی اہمیت کو اُجاگر کیا۔اِس موقعہ پر کمشنر سیکرٹری نے اعلان کیا کہ حکومت کی تمام عمارتوں کو روف ٹاپ سولر پاور فراہم کی جائے گی۔کمشنر سیکرٹری نے ضلع ترقیاتی کمشنر کپواڑہ کی کوششوںکو سراہتے ہوئے کہا کہ آیوشی سوڈان ضلع میں مثبت تبدیلی، ترقی اور مختلف جغرافیائی چیلنجوں سے نمٹنے کے لئے بہترین اور قابل ضلع ترقیاتی کمشنروں میں سے ایک ہے۔اِس موقعہ پرچیئرمین ڈی ڈی سی کپواڑہ عرفان سلطان پنڈت پوری نے ایس ٹی گھرانوں کے لئے سولر ہوم لائٹس، مشہور سیاحتی مقام بنگس میں سیاحت کے بنیادی ڈھانچے کی ترقی اور ضلع کے کسانوں کے لئے زرعی مقاصد کے لئے شمسی توانائی سے چلنے والے پمپوں کا مطالبہ کیا۔اِس موقعہ پرضلع ترقیاتی کمشنر محترمہ آیوشی سوڈان نے ضلع میں ترقی اور دیگر اقدامات کی ایک مختصر تصویر پیش کی۔اُنہوں نے کہا کہ ضلع میں سیاحتی شعبے کو بڑا فروغ ملا ہے۔سال 2019-20 ء میں چھ ہزار سیاحوں نے کپواڑہ ضلع کا دورہ کیا لیکن 2023-24 ء میں 4,50,000 سیاحوں نے کپواڑہ ضلع کا دورہ کیا جو ایک ریکارڈ ہے۔اُنہوں نے کہا کہ کپواڑہ ضلع ایک اسپریشنل ضلع ہے اور اس کے دو بلاک کیرن اور مژھل اسپریشنل بلاکوں میں ہیں۔ ضلع میں 100 سمارٹ کلاس رومز ہیں اور 100 مزید پائپ لائن میں ہیں۔ اُنہوں نے مزید کہا کہ ضلع میں تقریباً 28,000 بے روزگار نوجوانوں نے خود روزگار سکیموں سے فائدہ اُٹھایا ہے۔اِس موقعہ پر وائس چیئرمین ڈی ڈی سی حاجی فاروق احمد میر نے کہا کہ ایل جی اِنتظامیہ کا نقطہ نظر نچلی سطح تک رَسائی اِس بات کو یقینی بنارہا ہے کہ پالیسیوں اور پروگراموں کو مؤثر طریقے سے عملایاجائے او رمقامی کمیونٹیوں کی ضروریات کو مناسب طریقے سے پورا کیا جائے۔اِس سے قبل کمشنر سیکرٹری نے مختلف محکموں کی جانب سے لگائے گئے سٹالوں کا بھی معائینہ کیا ، ان کی کامیابیوں اور سکیموں کو اُجاگر کیا اورٹائون ہال کپواڑہ کے لان میں دیودار کے پودے لگا کر شجرکاری مہم میں حصہ لیا۔اِس موقعہ پر کمشنر سیکرٹری نے فوڈ سٹور کرگام کی تعمیر، آر ڈی ڈی کی جانب سے 7 لاکھ روپے کی لاگت سے مکمل کئے گئے منصوبے، کلیگام اے میں کمیونٹی ہال کی تعمیر، 16 لاکھ روپے کی لاگت سے مکمل ہونے والے تین منصوبوں، بن پورہ ماگام پروجیکٹ پر ٹائل پتھ کی تعمیر اور آر ڈی ڈی کی جانب سے 9.30 کروڑ روپے کی لاگت سمیت تین منصوبوں کا دیگر معززین کی موجودگی میں اِی ۔افتتاح کیا۔عوامی دربار میں ڈی ڈی سی درگمولہ ایڈوکیٹ آمنہ مجید، چیئرمین ٹریڈرز فیڈریشن، چیئرمین ٹرانسپورٹ ایسوسی ایشن کپواڑہ، اے ڈی سی کپواڑہ، اے ڈی ڈی سی کپواڑہ ،جے ڈی پلاننگ، ایس ای آر اینڈ بی، ضلعی افسران، سیکٹورل افسران کے علاوہ عوام کی بڑی تعداد نے شرکت کی۔
