سرینگر//وزیر برائے خوراک ، شہری سپلائیز اور امور صارفین ، انفارمیشن ٹیکنالوجی ، ٹرانسپورٹ ، یوتھ سروسز اینڈ سپورٹس اور سائینس و ٹیکنالوجی مسٹر ستیش شرما نے ڈیجیٹل انفراسٹرکچر کو مضبوط بنانے ، تکنیکی اختراعات کو فروغ دینے اور جموں و کشمیر میں کھیلوں اور تفریحی سرگرمیوں میں نوجوانوں کی شرکت کی حوصلہ افزائی کیلئے حکومت کے عزم کا اعادہ کیا ۔ وزیر موصوف انسٹی ٹیوشن آف انجینئرز ( انڈیا ) ، جموں و کشمیر اسٹیٹ سینٹر ( آئی ای آئی ۔جے کے ایس سی ) کی جانب سے ورلڈ ٹیلی کمیونیکیشن اینڈ انفارمیشن سوسائٹی ڈے 2026 کے موقع پر منعقدہ ایک روزہ سیمینار کے دوران خطاب کر رہے تھے جس کا موضوع ’’ ڈیجیٹل لائف لائنز ۔ ایک منسلک دنیا میں لچک کو مضبوط بنانا ‘‘ تھا ۔ سیمینار نے انجینئرز ، پالیسی سازوں ، ٹیلی کام کے پیشہ ور افراد ، ماہرین اور عوامی نمائندوں کو ایک دوسرے سے منسلک دنیا میں لچکدار ڈیجیٹل انفراسٹرکچر ، سائیبر سیکورٹی ، براڈ بینڈ کنیکٹیویٹی اور جامع تکنیکی ترقی کی بڑھتی ہوئی اہمیت پر غور کرنے کیلئے اکٹھا کیا ۔ اجتماع سے خطاب کرتے ہوئے مسٹر ستیش شرما نے کہا کہ مضبوط ڈیجیٹل کنیکٹیویٹی جدید حکمرانی اور سماجی و اقتصادی ترقی کی ریڑھ کی ہڈی بن گئی ہے ۔ انہوں نے کہا کہ حکومت ڈیجیٹل خدمات تک مساوی رسائی کو یقینی بنانے اور جموں و کشمیر میں مواصلاتی ڈھانچے کو مضبوط بنانے کی خواہاں ہے ۔ وزیر موصوف نے جدید ٹیکنالوجی کو اپنانے اور نمستقبل کیچیلنجوں کا مقابلہ کرنے کے قابل محفوظ اور لچکدار ڈیجیٹل سسٹم بنانے اہمیت پر زور دیا ۔ انہوں نے ابھرتے ہوئے تکنیکی مسائل پر تکنیکی آگاہی ، اختراعات اور تعمیری مکالمے کو فروغ دینے میں آئی ای آئی ۔ جے کے ایس سی جیسے پیشہ ور اداروں کے کردار کی تعریف کی ۔
