یاتریوں کی بروقت نگرانی کیلئے اِس برس کی یاتر ا کیلئے آر ایف آئی ڈیز کو لازمی قرار دیا گیا ہے
سری نگر//دو برس کے وقفے کے بعد جموںوکشمیر حکومت کی بہترین اور فقید المثال اِنتظامات کے ساتھ منعقدہ ہونے والی 43 روزہ اَمرناتھ جی یاترا 30 ؍جون کوشروع ہو رہی ہے ۔حکومت یاتریوں کو بہترین سہولیات فراہم کرنے کے لئے پُر عزم ہے۔اِنتظامات میں گذشتہ برسوں کی نسبت بہتری لائی گئی ہے ۔ ٹریفک مینجمنٹ ، صحت ، مواصلات ، پانی کی صفائی سمیت تمام ضروری سہولیات موجود ہیں۔جموںوکشمیر حکومت نے اَمرناتھ یاترا۔ 2022ء کے لئے آنے والے یاتریوں کو معیاری ہیلتھ کیئر فراہ کرنے کو اوّلین ترجیح دی ہے ۔ شری اَمرناتھ شرائین بورڈ ، محکمہ صحت ، سیکورٹری فورسز اور مختلف این جی او ز کے ذریعے یاتریوں کے لئے ایک مربوط ہیلتھ کیئر دستیاب کی گئی ہے۔ڈیزاسٹر مینجمنٹ ڈیپارٹمنٹ نے آنے والی اَمرناتھ یاترا کے دوران کسی بھی ناخوشگوار واقعے سے نمٹنے کے لئے اہم مقامات پر کئے گئے مجموعی تیاریوں اور اقدامات کا جائزہ لینے کے لئے نیشنل ڈیزاسٹر مینجمنٹ اَتھارٹی نیشنل، ڈسٹرکٹ ڈیزاسٹر مینجمنٹ اتھارٹیز اور تمام متعلقہ سرکاری اور پرائیویٹ ایجنسیوں کے اشتراک سے سونہ مرگ سے امرناتھ گپھا تک بال بیس کیمپ میںایک موک ڈرل کا اِنعقاد کیا۔اِس برس یاترا میں یاتریوں کی حفاظت کو یقینی بنانے کے لئے آر ایف آئی ڈیز کو لازمی بنایا گیا ہے تاکہ یاتریوں کو گپھا کے راستے میں ٹریک کر کے ان کی بروقت نگرانی کی جاسکے۔جموںوکشمیر کے لیفٹیننٹ گورنر اور چیئر پرسن شری اَمرناتھ جی شرائین بورڈ منوج سِنہا نے امرناتھ یاتریوں کی سہولیت کے لئے ایک آن لائن ہیلی کاپٹر بُکنگ پورٹل کا آغا ز کیا۔پہلی بار یاتری سری نگر سے پنچترنی تک آسانی سے سفر کرسکتے ہیں اور ایک ہی دِن میں پوتر یاتر امکمل کرسکتے ہیں ۔حکومت کی طویل عرصے سے زیر اِلتوأ سری نگر سے آنے والے یاتریوں کے لئے ہیلی کاپٹر خدمات کو متعارف کرنے کی کوشش تھی۔اُنہوں نے کہا ،’’ یاتری ہیلی کاپٹر بُکنگ کرنے کے لئے شرائین بورڈ کی ویب سائٹ (http://www.shriamarnathjishrine.com) پر لاگ اِن کرسکتے ہیں۔جموںوکشمیر حکومت نے اِس بات کو یقینی بنایا ہے کہ پوتر گپھا کا درشن پر یاتریوں کا تجربہ خوشگوار ہو۔ایک سرکاری آفیسر نے بتایا کہ اِس بات کو یقینی بنانے کے لئے ہدایات جاری کی گئی ہیں کہ تمام یاتریوں کو چوکیوں پر تیزی سے گزرنے کاموقعہ ملے اور کسی بھی یاتری کو بیس کیمپوں میںجاتے ہوئے 30منٹ سے زیادہ اِنتظار نہ کرنا پڑے۔دریں اثناء،لیفٹیننٹ گورنر نے تمام شراکت دار محکموں کی تیاری اور رسپانس میکانزم کا جائزہ لینے کے لئے بال تل اور پہلگام کا بھی دورہ کیا۔یاترا کے دونوں راستوں پر سہولیات کا سائٹ پرمعائینہ کیا۔اُنہوں نے شری اَمرناتھ جی یاتریو ں کے لئے معیاری ہیلتھ کیئر کی خدمات کے لئے 70 بستروں پر مشتمل مکمل طور پر لیس ڈی آر ڈی او ہسپتال کا بھی اِفتتاح کیا۔لیفٹیننٹ گورنر نے بیس کیمپوں میں رہائش ، ہیلتھ کیئر ، مواصلاتی نیٹ ورک ، صفائی ستھرائی ، پانی کی فراہمی ، موسم کی پیش گوئی ، ایمرجنسی رسپانس ، فائر سیفٹی اور دیگر تمام بنیادی ضروریات کے بارے میں جائزہ میٹنگیں بھی کیں۔ایک آفیسر نے بتایا کہ یاتریوں کے اونچائی پر آنے والے طبی مسائل کو پورا کرنے کے لئے مناسب تعداد میں آکسیجن سلنڈر ، میڈیکل بیڈ ،ایمرجنسی جواب دہندگان ، ڈاکٹروں اور نرسنگ عملے کو کسی بھی ہنگامی صورتحال سے نمٹنے کے لئے تعینات کیا گیا ہے۔ڈائریکٹر ہیلتھ سروسز کشمیر نے کہا کہ سالانہ اَمرناتھ یاترا سے قبل تقریباً 100ایمبولینسوں اور 70 صحت سہولیات کو تیار رکھا گیا ہے جس میں 6 بیس ہسپتال ، طبی اِمدادی مراکز ، ایمرجنسی اِمدادی مراکز اور 26آکسیجن بوتھ کو ریڈ موڈ میں رکھا گیا ہے۔اُنہوں نے کہا،’’ اِس کے علاوہ 11آن روٹ سہولیات اور 17 دیگر ہسپتال دستیاب ہیں جبکہ 100 کریٹکل اور بنیادی نگہداشت کی ایمبولینسیں بھی تیار موڈ میں رکھی گئی ہیں اور دونوں راستوں سے 100 سے زیادہ ایمبولینسیں دستیاب ہیں۔‘‘اُنہوں نے مزید کہا کہ روٹ پر تمام ہسپتالوں میں ایمرجنسی رسپانس سسٹم ہوگا جس میں تمام اَفرادی قوت چوبیس گھنٹے دستیاب ہوگی ۔ اِس کے علاوہ چند واڑی اور بال تل میں دو وقف شدہ 70 بستروں والے ہسپتال بھی تیار ہیں۔
