سوالیہ پرچوں میں سنگین خامیاں سامنے آئیں/رپورٹ
سرینگر// نیشنل ٹیسٹنگ ایجنسی نے این ای ٹی۔یو جی سی جون 2026 کے تین پرچوں، انگریزی، کامرس اور سوشیالوجی، کا امتحان دوبارہ لینے کا فیصلہ کیا ہے۔ یہ فیصلہ سوالیہ پرچوں میں متعدد سنگین غلطیوں اور خامیوں کی نشاندہی کے بعد کیا گیا ہے۔ این ٹی اے کے مطابق ان تینوں مضامین کے امیدواروں کو دوبارہ امتحان میں شرکت کرنا ہوگی، تاہم اس کے لیے ان سے کوئی اضافی فیس وصول نہیں کی جائے گی۔ این ای ٹی ۔یو جی سی جون 2026 کا امتحان 22 جون سے 30 جون تک ملک بھر میں 87 مضامین کے لیے منعقد کیا گیا تھا۔ امتحان کے بعد امیدواروں کی جانب سے سوالیہ پرچوں میں غلطیوں سے متعلق متعدد شکایات موصول ہوئیں، جس کے بعد این ٹی اے نے معاملے کی جانچ کے لیے ایک کمیٹی تشکیل دی۔کمیٹی نے سوالیہ پرچوں کا تفصیلی جائزہ لینے کے بعد ان میں وسیع پیمانے پر حقائق، املا، زبان اور ترجمے سے متعلق غلطیوں کی نشاندہی کی۔ سوشیالوجی کے پرچے میں معروف اسکالرز کے ناموں تک کو غلط انداز میں درج کیا گیا۔ مثال کے طور پررٹزر کوپٹزر اور پارسنزکو پارسو لکھا گیا، جبکہ گھورے اور ناسوبوم جیسے ناموں میں بھی غلطیاں پائی گئیں۔رپورٹ کے مطابق بعض سوالات میں کتابوں کے عنوانات غلط یا بگڑی ہوئی شکل میں درج تھے، جبکہ کئی سوالات کے بنیادی متن میں بھی خامیاں موجود تھیں۔ اس کے علاوہ گرامر، واحد اور جمع، مذکر و مؤنث کے استعمال، رموز اوقاف اور معروف علمی اصطلاحات کے حوالے سے بھی متعدد مسائل سامنے آئے۔کمیٹی نے اس بات کی بھی نشاندہی کی کہ انگریزی اور کامرس سمیت بعض پرچوں میں پہلے منعقد کیے جاچکے امتحانات کے متعدد سوالات دوبارہ شامل کیے گئے تھے۔ بعض رپورٹس میں دعویٰ کیا گیا کہ کئی سوالات سابقہ امتحانات میں تقریباً اسی ترتیب اور جوابی اختیارات کے ساتھ بھی آچکے تھے۔ این ٹی اے کے مطابق خامیوں کا حجم اتنا زیادہ تھا کہ صرف غلط سوالات کو خارج کرکے یا جوابی کلید کے مرحلے میں ان کا ازالہ کرکے امتحان کے معیار اور شفافیت کو یقینی بنانا ممکن نہیں تھا۔ اسی بنیاد پر کمیٹی نے تینوں پرچوں کا مکمل طور پر دوبارہ امتحان لینے کی سفارش کی، جسے این ٹی اے نے قبول کرلیا۔نظرثانی شدہ شیڈول کے مطابق انگریزی کا پرچہ 9 ستمبر 2026 کو صبح کی شفٹ میں صبح 9 بجے سے دوپہر 12 بجے تک منعقد ہوگا۔ اسی روز کامرس کا امتحان دوسری شفٹ میں سہ پہر 3 بجے سے شام 6 بجے تک ہوگا۔ سوشیالوجی کا پرچہ 10 ستمبر کو صبح 9 بجے سے دوپہر 12 بجے تک منعقد کیا جائے گا۔ این ٹی اے نے واضح کیا ہے کہ دوبارہ امتحان میں شرکت کرنے والے امیدواروں سے کوئی اضافی امتحانی فیس وصول نہیں کی جائے گی۔ امتحانی شہروں، مراکز اور ایڈمٹ کارڈ سے متعلق تفصیلات بعد میں این ٹی اے کی سرکاری ویب سائٹ پر جاری کی جائیں گی۔ این ای ٹی۔یو جی سی جون 2026 کے امتحان میں تمام 87 مضامین کے تقریباً 7 لاکھ 36 ہزار امیدواروں نے شرکت کی تھی۔ یہ امتحان جونیئر ریسرچ فیلو شپ ، اسسٹنٹ پروفیسرکے لیے اہلیت اور پی ایچ ڈی پروگراموں میں داخلے سے متعلق اہلیت طے کرنے کے لیے منعقد کیا جاتا ہے۔ این ٹی اے نے کہا ہے کہ انگریزی، کامرس اور سوشیالوجی کے علاوہ دیگر 84 مضامین کے نتائج اور متعلقہ عمل مقررہ شیڈول کے مطابق جاری رہیں گے اور تین پرچوں کے دوبارہ امتحان کی وجہ سے ان کے نتائج کے عمل میں تاخیر نہیں ہوگی۔
