سکینہ ایتو نے رام بن اور ریاسی کے واقعات میں جانی نقصان پر گہرے دُکھ کا اظہار کیا

سرینگر//وزیر صحت و طبی تعلیم ، سماجی بہبود اور تعلیم محترمہ سکینہ ایتو نے ریاسی اور رام بن اضلاع میں قدرتی آفات کے باعث ہونے والے قیمتی جانی نقصان پر گہرے دُکھ اور افسوس کا اظہار کیا ہے ۔ وزیر نے کہا کہ یہ دل دہلا دینے والی بات ہے کہ رام بن میں بادل پھٹنے اور ریاسی ضلع میں لینڈ سلائیڈنگ کے واقعات میں کئی قیمتی جانیں ضائع ہوئی ہیں ۔ انہوں نے مزید کہا کہ ان سانحات نے متاثرہ خاندانوں کو ناقابل برداشت تکلیف دی ہے اور میری دلی تعزیت ان داغ دیدہ خاندانوں اور ان کے رشتہ داروں کے ساتھ ہے ۔ وزیر نے مزید کہا کہ دونوں اضلاع میں ضلعی انتظامیہ ، خاص طور پر محکمہ صحت اور ڈیزاسٹر منیجمنٹ حکام کو متاثرہ خاندانوں کو فوری امداد فراہم کرنے کیلئے متحرک کر دیا گیا ہے ۔ محترمہ سکینہ نے عوام سے اپیل کی کہ موسم کی خرابی کے انتبابات کے پیش نظر لوگ احتیاط اور چوکنا رہیں ، لینڈ سلائیڈنگ کے خطرے والے علاقوں سے پرہیز کریں اور اپنی حفاظت کیلئے حفاظتی ہدایات پر سختی سے عمل کریں ۔