وزیر اعلیٰ نے سدھ مہادیو ۔ درنگا ، سنگھ پورہ ۔ وائلو سرنگوں کی منظوری کیلئے پی ایم مودی ، گڈکری کا شکریہ ادا کیا

سرینگر//وزیر اعلیٰ مسٹر عمر عبداللہ نے این ایچ 244 پر سدھ مہا دیو ۔ درنگا اور سنگھ پورہ ۔ وائلو ٹنل پروجیکٹوں کی حمایت اور منظوری کیلئے وزیر اعظم شری نریندر مودی اور مرکزی وزیر برائے روڈ ٹرانسپورٹ اور ہائی ویز نتن گڈکری کا تہہ دل سے شکریہ ادا کیا ۔ وزیر اعلیٰ نے کہا کہ بنیادی ڈھانچے کے یہ اہم منصوبے نمایاں طور پر رابطے کو مضبوط بنائیں گے ، ہر موسم تک رسائی کو یقینی بنائیں گے اور وادی چناب اور ملحقہ علاقوں میں اقتصادی ترقی کو تیز کریں گے ۔ حکومت ہند نے جموں و کشمیر میں این ایچ 244 میں 9,779.42کُل تخمینہ لاگت پر یک طرفہ جڑواں ٹیوب سدھ مہادیو ۔ درنگا ٹنل ( 12.85 کلو میٹر بشمول 2 لین پلس پیویڈ شوڈر اپروجز) اور ٹوئن ٹیوب سنگھ پورہ ۔ وائلو ٹنل ( 38.61 کلو میٹر 2 لین پلس پیویڈ شوڈر اپروجز سمیت ) کی تعمیر کی منظوری دی ہے ۔ اپنی سابقہ مداخلت کو یاد کرتے ہوئے وزیر اعلیٰ نے کہا کہ گذشتہ سال جون میں انہوں نے وزیر اعظم اور مرکزی وزیر کو خط لکھ کر پروجیکٹوں میں تاخیر کو اجاگر کیا تھا اور ان پر فوری غور کرنے کا مطالبہ کیا تھا ۔ انہوں نے زور دیا کہ سڑک ٹرانسپورٹ اور شاہراہوں کی وزارت کی این ایچ ( او ) اسکیم کے تحت پروجیکٹوں کو ترجیحی بنیادوں پر شروع کیا جائے تا کہ جموں و کشمیر اور قوم کی ترقی کے وسیع تر وژن کے مطابق ان کی بروقت تکمیل کو یقینی بنایا جا سکے ۔ اپنی بات چیت میں وزیر اعلیٰ نے اس بات پر بھی تشویش کا اظہار کیا تھا کہ این ایچ 244 پر این ایچ آئی ڈی سی ایل کے تحت دیگر این ایچ پروجیکٹوں پر کام جاری ہے ، ان دو اہم ٹنلوں میں تاخیر چناب خطے کیلئے متوقع سماجی و اقتصادی فوائد میں رکاوٹ بن رہی ہے اور اس کی معاشی پسماندگی پر قابو پانے کی کوششوں میں رکاوٹ ہے ۔