مندیپ کور نے جانی پور ۔پلورہ علاقوں میں صفائی ستھرائی اور تجاوزات کے مسائل کا جائزہ لیا
جموں//کمشنر سیکرٹری محکمہ مکانات و شہری ترقی مندیپ کور نے کمشنر جے ایم سی ڈاکٹر دیونش یادو کے ہمراہ جموں میونسپل کارپوریشن (جے ایم سی) کی جانب سے چلائی جانے والی صفائی مہم ’یوم سوچھ جمہوریہ مہم‘ کے تحت آج وارڈ نمبر 34، 35، 36، 37 اور 38 میں صفائی اور تجاوزات سے متعلق مسائل کا تفصیلی جائزہ لیا۔معائینے کے دوران اولڈ جانی پور، ہائی کورٹ چوک، پاور ہاؤس، لکڑ منڈی، جانی پور کالونی، پلورہ، پٹولی اور ملحقہ علاقوں کا اِحاطہ کیا گیا۔ سینئر اَفسران نے گلیوں، سڑکوں، نالیوں اور عوامی مقامات میں صفائی کی صورتحال کا موقعے پر جائزہ لیا،سالڈ ویسٹ مینجمنٹ سسٹم کا معائینہ کیا اور سڑکوں، فٹ پاتھوں اور دیگر عوامی مقامات پر تجاوزات کی حد کا مشاہدہ کیا۔دورے کے دوران مندیپ کور نے اس بات پر زور دیا کہ یوم سوچھ جمہوریہ مہم کا مقصد یومِ جمہوریہ کی تقریبات سے قبل ایک صاف ستھرا، صحت مند اور منظم شہر کو یقینی بنانا ہے۔ اُنہوں نے متعلقہ اَفسران کو ہدایت دی کہ تمام علاقوں میں روزانہ اور مکمل صفائی کو یقینی بنایا جائے، کوڑاکرکٹ کو بروقت اُٹھانے ، کوڑا کرکٹ کی مناسب علیحدگی اور بلا تعطل گھر گھر سے کوڑا جمع کرنے کے نظام کو برقرار رکھا جائے۔کمشنر سیکرٹری موصوفہ نے حکام کو یہ بھی ہدایت دی کہ غیر قانونی تجاوزات کے خلاف سخت اور مستقل کاررِوائی کی جائے بالخصوص وہ تجاوزات جو پیدل چلنے والوں کے لئے تکالیف و مشکلات پیدا کر رہی ہوں اور ٹریفک کی روانی میں رُکاوٹ بن رہی ہوں، تاہم اِس بات کو یقینی بنایا جائے کہ نفاذِی کارروائیاں اِنسانی ہمدردی اور قانونی دائرے میں رہ کر اَنجام دِی جائیں۔ ڈاکٹر دیونش یادو نے کمشنر سیکرٹری موصوفہ کو جموں میونسپل کارپوریشن کی جانب سے جاری صفائی مہمات اور نفاذی اَقدامات کے بارے میںجانکاری دِی۔ اُنہوں نے جے ایم سی کے فیلڈ عملے اور کارپوریشن کی جانب سے منسلک صفائی کمپنی کو ہدایت دی کہ مناسب اَفرادی قوت اور مشینری کی تعیناتی کے ذریعے صفائی کے کاموں میں مزید تیزی لائی جائے، صفائی کارکنان کی بروقت حاضری کو یقینی بنایا جائے اور تمام وارڈوں میں اعلیٰ معیار کی خدمات برقرار رکھی جائیں۔ اُنہوں نے اِس بات پر زور دیا کہ’ یوم سوچھ جمہوریہ مہم ‘کے مقاصد کے حصول کے لئے میونسپل حکام اور صفائی ایجنسی کے درمیان قریبی تال میل نہایت ضروری ہے۔اَفسران نے مقامی رہائشیوں اور دُکانداروں سے بھی بات چیت کی، اُن کے مسائل سنے اور اُنہیںاس بات کی ترغیب دی کہ وہ کوڑا کرکٹ پھیلانے سے گریز کریں، کوڑے کو مناسب طریقے سے ٹھکانے لگائیں اور سرکاری زمین پر تجاوزات نہ کریں اور میونسپل کارپوریشن اور صفائی کمپنی کے ساتھ فعال تعاون کریں۔ رہائشیوں کو قومی تقریبات کے دوران شہر کو صاف ستھرا اور خوشنما رکھنے کے لئے اِجتماعی شرکت کی اہمیت سے بھی آگاہ کیا گیا۔جموں میونسپل کارپوریشن نے’یوم سوچھ جمہوریہ مہم‘ کی رفتار کو برقرار رکھنے اور شہر کے تمام وارڈوں میں صفائی ستھرائی اور شہری نظم و ضبط میں نمایاں بہتری لانے کے اَپنے عزم کا اعادہ کیا۔
