جی ایس ٹی کونسل کے فیصلے جموں و کشمیر کی مالی پوزیشن کو مضبوط بنائیں گے ، ترقی کی حمایت کریں گے ۔ عمر عبداللہ
نئی دہلی//وزیر اعلیٰ مسٹر عمرعبداللہ نے نئی دہلی میں مرکزی وزیر خزانہ و کارپوریٹ امور نرملا سیتا رمن کی صدارت میں جی ایس ٹی کونسل کی 57 ویں میٹنگ میں شرکت کی ۔ میٹنگ میں ملک بھر کے وزرائے اعلیٰ اور وزرائے خزانہ کے ساتھ ساتھ وزارت خزانہ حکومت ہند کے سینئر افسران بھی موجود تھے ۔ کونسل نے جی ایس ٹی سے متعلق اہم مسائل پر تفصیلی تبادلہ خیال کیا جس میں ریاستوں اور یو ٹیز کی مالی صلاحیت کو مضبوط بنانے ، محصولات کی وصولی کو بہتر بنانے اور متوازن مالیاتی وفاقیت کو آگے بڑھانے پر توجہ مرکوز رہی ۔ جموں و کشمیر کے وزیر خزانہ کی حیثیت سے میٹنگ میں شرکت کرتے ہوئے وزیر اعلیٰ مسٹر عمر عبداللہ نے اعتماد کا اظہار کیا کہ کونسل کے فیصلے جموں و کشمیر کی مالی پوزیشن کو مضبوط بنائیں گے ، اقتصادی ترقی کی حمایت کریں گے اور ترقی و عوامی بہبود کو تیز کریں گے ۔
