وزیراعلیٰ نے جموں و کشمیر بورڈ آف سکول ایجوکیشن کے سمر زون کے دسویں جماعت کے نتائج پر طلباء کو مُبارک باد دِی

جموں//وزیر اعلیٰ عمر عبداللہ نے جموں و کشمیر بورڈ آف سکول ایجوکیشن کی طرف سے سمر زون کے دسویں جماعت کے نتائج کے اعلان پر طلبأ کو مُبارک باد دِی۔اُنہوںنے تمام کامیاب اُمیدواروں کو نیک تمنائیں پیش کیں اور اُن طلبأکی حوصلہ افزائی کی جو اپنی مطلوبہ کامیابی حاصل نہ کر سکے کہ وہ پُر عزم رہیں اور بہترین کارکردگی کے لئے مسلسل کوشش جاری رکھیں۔ اِس سے قبل آج جموںوکشمیر بورڈ آف سکول ایجوکیشن نے صوبہ جموں کے سمر زون کے لئے دسویں جماعت کے سالانہ باقاعدہ امتحان کے نتائج کا اعلان کیا جس میں مجموعی طور پر کامیابی کی شرح 88.85 فیصد ریکارڈ کی گئی۔مجموعی طور پر 50,754 طالب علموں نے امتحان میں شرکت کی جن میں سے 45,094 اُمیدوار کامیاب ہوئے۔نتائج میں ایک بار پھر طالبات کی بہتر کارکردگی سامنے آئی جنہوں نے 90.42 فیصد کامیابی حاصل کی جبکہ طلباء کی کامیابی کی شرح 87.51 فیصد رہی اور تعلیمی میدان میں طالبات کی برتری کا سلسلہ برقرار رہا۔