سری نگر//بی بی سی کی دستاویزی فلم’’انڈیا: دی مودی سوال‘‘کی پہلی قسط کو شیئر کرنے والی متعدد یوٹیوب ویڈیوز کو وزارت اطلاعات و نشریات کی طرف سے جاری کردہ ہدایات کے مطابق بلاک کر دیا گیا ہے۔جے کے این ایس مانٹرینگ ڈیسک کے مطابق نئی دہلی میںذرائع نے ہفتہ کو بتایاکہ یوٹیوب ویڈیوز کیساتھ ساتھ مرکزی حکومت نے ٹوئٹر کو بھی ہدایت دی ہے کہ وہ متعلقہ یوٹیوب ویڈیوز کے لنکس پر مشتمل 50 سے زیادہ ٹویٹس کو بلاک کرے۔آئی ٹی رولز 2021 کے تحت ہنگامی اختیارات کا استعمال کرتے ہوئے جمعہ کومرکزی محکمہ اطلاعات اور نشریات کے سیکرٹری کی طرف سے مبینہ طور پر ہدایات جاری کرنے کے بعد یوٹیوب اور ٹویٹر دونوں نے حکومت کی تعمیل کی۔جمعرات کو، ہندوستان نے وزیر اعظم نریندر مودی پر بی بی سی کی متنازع دستاویزی سیریز کی مذمت کی اور اسے ایک’’پروپیگنڈا پیس‘‘قرار دیا جو کہ ایک بدنام بیانیہ کو آگے بڑھانے کے لیے ڈیزائن کیا گیا ہے۔ وزارت خارجہ کے ترجمان ارندم باغچی نے ہفتہ وار میڈیا بریفنگ کے دوران کہاکہ ہمارے خیال میں یہ ایک پروپیگنڈہ ہے جو ایک مخصوص بدنام بیانیہ کو آگے بڑھانے کے لیے ڈیزائن کیا گیا ہے۔انہوںنے کہاکہ تعصب اور معروضیت کی کمی اور واضح طور پر جاری نوآبادیاتی ذہنیت واضح طور پر نظر آتی ہے۔حکومتی ذرائع نے کہاکہ اگرچہ یہ دستاویزی فلم بھارت میں بی بی سی کی جانب سے دستیاب نہیں کرائی گئی تھی، لیکن کچھ یوٹیوب چینلز نے اسے بھارت مخالف ایجنڈے کو فروغ دینے کیلئے اپ لوڈ کیا ہے۔ ذرائع کا کہنا ہے کہ یوٹیوب کو یہ بھی ہدایت کی گئی ہے کہ اگر ویڈیو دوبارہ اپنے پلیٹ فارم پر اپ لوڈ کی گئی تو اسے بلاک کر دیا جائے۔ انہوں نے مزید کہا کہ ٹویٹر کو دوسرے پلیٹ فارمز پر ویڈیو کے لنک پر مشتمل ٹویٹس کی شناخت اور بلاک کرنے کی بھی ہدایت کی گئی ہے۔ذرائع کے مطابق یہ فیصلہ متعدد وزارتوں کے اعلیٰ سرکاری عہدیداروں کی جانب سے دستاویزی فلم کی جانچ پڑتال کے بعد کیا گیا اور یہ پایا گیا کہ یہ سپریم کورٹ آف انڈیا کے اختیار اور ساکھ پر شکوک و شبہات ڈالنے اور مختلف ہندوستانی برادریوں کے درمیان تفرقہ ڈالنے کی کوشش ہے۔ ذرائع نے مزید کہا کہ اس کے مطابق دستاویزی فلم ہندوستان کی خودمختاری اور سالمیت کو نقصان پہنچاتی ہے، اور غیر ملکی ریاستوں کے ساتھ ہندوستان کے دوستانہ تعلقات پر منفی اثر ڈالنے کی صلاحیت رکھتی ہے۔
