سبھی زخمیوںکی حالت مستحکم، دھماکوں سے متعلق تحقیقات جاریـADGPجموں مکیش سنگھ
سری نگر//راہول گاندھی کی بھارت جوڑئویاتراکے جموں پہنچے سے2روزقبل اور73ویںیوم جمہوریہ سے5دن قبل سنیچر کی صبح جموں شہر کے مضافاتی علاقہ نروال میں یکے بعددیگر2دھماکے ہوئے ،جن کی زدمیں آکر ابھی تک ملی اطلاعات کے مطابق9افرادزخمی ہوگئے ۔ٹرانسپورٹ نگرنروال میںہوئے دھماکوںکے بعد پورے جموں شہر اوراسکے نواحی اضلاع میں سیکورٹی ایجنسیوںکوہائی الرٹ کردیاگیااور دھماکوںمیں ملوث افرادکی بڑے پیمانے پرشناخت اورتلاش کرنے کی کارروائی شروع کردی گئی ۔سینئرپولیس حکام نے جائے واردات کادورہ کرکے دھماکوں سے متعلق ابتدائی معلومات حاصل کرنے کیساتھ ساتھ سیکورٹی اقدامات کاسرنو جائزہ لیا۔جے جے این ایس کے مطابق جموں وکشمیرکی سرمائی راجدھانی جموںمیں اُسوقت خوف وہراس کی لہردوڑ گئی اورتمام سیکورٹی ایجنسیوںکوالرٹ کردیا گیا،جب یہاں نروال علاقے کے مصروف ترین بازار ٹرانسپورٹ نگرمیں سنیچر کی صبح ایک کے بعدایک 2پُراسرار دھماکے ہوئے ۔ذرائع نے زخمیوں کی شناخت سہیل اقبال، وشو پرتاپ، ونود کمار، ارجن کمار، امیت کمار، راجیش کمار اور انیش ساکنان جموں اور ڈوڈا کے سشیل کمار کے طور پر کی ہے۔حکام نے بتایا کہ پہلے دھماکے کے فوراً بعد پولیس اور سی آر پی ایف کی مشترکہ ٹیموں نے پورے علاقے کو گھیرے میں لے لیا جس کے15 منٹ بعد دوسرا دھماکہ ہوا۔انہوں نے کہا کہ صفائی کا ایک مکمل آپریشن کیا گیا اور فرانزک ماہرین، بم ڈسپوزل اسکواڈ اور اسنفر کتوں کو بھی سراغ تلاش کرنے کے لیے کام میں لگایا گیا۔ایک عینی شاہد جسوندر سنگھ نے بتایا کہ پہلا دھماکا ایک گاڑی میں ہوا جو مرمت کیلئے ایک ورکشاپ میں تھی۔موٹر اسپیئر پارٹس ایسوسی ایشن کے صدر سنگھ نے بتایا کہ تقریباً15 منٹ بعد ایک اور دھماکہ تباہ شدہ پرزوں اور کچرے سے بھرے علاقے میں ہوا۔راج کمار نے بتایا کہ وہ دوسری گاڑی پر کام کر رہے تھے جب دھماکے سے ایک اور کھڑی گاڑی کو ٹکڑے ٹکڑے کر دیا۔انہوں نے کہا کہ ہم نے ابتدائی طور پر سوچا کہ کسی گاڑی کا پٹرول ٹینک پھٹ گیا لیکن دھماکہ اتنا زور دار تھا کہ اس نے گاڑی کو اڑا دیا۔اُدھرپولیس کو شبہ ہے کہ آئی ای ڈیز کا استعمال ایک مرمت کی دکان میں کھڑی ایک SUV اور ناروال کے ٹرانسپورٹ نگر علاقے میں قریبی کباڑ خانے میں ایک گاڑی میں دوہرے دھماکوں کو انجام دینے کیلئے کیا گیا تھا۔ ایڈیشنل ڈائریکٹر جنرل آف پولیس مکیش سنگھ نے دھماکے کے مقام کے قریب صحافیوں کو بتایاکہ ایک پرانی، کھڑی ہوئی بولیرو (اسپورٹس یوٹیلیٹی وہیکل) میں صبح 11 بجے کے قریب دھماکہ ہوا جس کے نتیجے میں قریب کھڑے 5 افراد زخمی ہوئے،جن کو اسپتال منتقل کیا گیا اوروہاں ان کی حالت مستحکم ہے۔انہوں نے کہا کہ فوری طور پر پورے علاقے کو لوگوں سے خالی کرا لیا گیا لیکن اسی دوران 50 میٹر کے فاصلے پر ایک اور دھماکہ ہوا جس سے ایک اور شخص معمولی زخمی ہوا جسے ہسپتال منتقل کر دیا گیا۔انہوں نے کہاکہ دھماکوں سے متعلق تحقیقات اورمزید تفتیش جاری ہے۔اُدھر ذرائع نے بتایاکہ دونوں دھماکوں کے بعد سرکاری میڈیکل کالج جموں (جی ایم سی) کے ہسپتال میں کل9 افراد کو پھٹنے کے زخم آئے تھے۔ہسپتال کے ایک ڈاکٹر نے بتایاکہ ہمیں 9مریض ملے ہیں جن میں سے ایک کے پیٹ میں چوٹیں آئی ہیں اور 2 کی ٹانگیں ٹوٹی ہوئی ہیں۔ ان سب کی حالت مستحکم ہے۔یہ دھماکے مشتبہ دہشت گردوں کی جانب سے ایسے وقت میں کیے گئے جب کانگریس کی جاری بھارت جوڑو یاترا اور26جنوری کومنائے جانے والے آئندہ یوم جمہوریہ کی تقریبات کے پیش نظر خطے میں سیکورٹی ایجنسیاں ہائی الرٹ پر ہیں۔راہول گاندھی کی بھارت جوڑو یاترا پنجاب کے راستے جمعرات کی شام جموں کشمیر کے کٹھوعہ ضلع میں داخل ہوئی اور جموںسے تقریباً70 کلومیٹر دور چڈوال میں ڈیرہ ڈالی ہے۔یادرہے ہفتہ کو ایک دن کے وقفے کے بعد، یاترا، جو7 ستمبر کو کنیا کماری سے شروع ہوئی تھی، اتوار کو ہیرا نگر سے دوبارہ شروع ہوگی اور سامبا ضلع کے وجے پور سے شروع ہونے کے بعد23 جنوری کو جموں پہنچے گی۔
