جائیدادضبطی کیلئے پہلی مرتبہNDPSایکٹ کاستعمال
سری نگر//جموں و کشمیر پولیس نے بانڈی پورہ میں ایک اہم کارروائی میں ضلع کے ایک بدنام زمانہ منشیات فروش کے غیر قانونی طور پر حاصل کئے گئے لاکھوں روپے مالیت کے اثاثوں کو ضبط کرلیا۔جے کے این ایس کوملی تفصیلات کے مطابق حکام نے بتایا کہ ضلع بانڈی پورہ میں ایک بدنام زمانہ منشیات فروش خورشید احمد وازہ،المعروف منڈیلا ، کی جائیداد کو سخت نارکوٹک ڈرگس اینڈ سائیکوٹرپک سبسٹنسز (NDPS) ایکٹ کے تحت ضبط کیا گیا ہے۔انہوں نے بتایا کہ منشیات اسمگلنگ سے خریدی گئی جائیداد(جس کوضبط کیاگیاہے)میں ایک کنال ڈیڑھ مرلہ کا رہائشی پلاٹ، جس کی قیمت 44 لاکھ روپے ہے، اور 12 لاکھ روپے کی2گاڑیاں بھی شامل ہیں ،اوراس طرح سے بدنام زمانہ منشیات فروش کے غیر قانونی طور پر حاصل کئے گئے56 لاکھ روپے مالیت کے اثاثوں کو ضبط کرلیا گیاہے۔انہوںنے بتایاکہ ملزم کو بھی گرفتار کیاگیا۔حکام کے مطابق یہ ضبطی بانڈی پورہ ضلع میں منشیات کی اسمگلنگ کیخلاف جنگ میں ایک اہم سنگ میل کی نشاندہی کرتی ہے، کیونکہ یہ پولیس کی جانب سے اس مسئلے سے نمٹنے کے لیے NDPS ایکٹ کا استعمال کرنے کا پہلا واقعہ ہے۔حکام کے مطابق ضبط کئے گئے اثاثے نشہ آور ادویات کی فروخت سے حاصل ہونے والی رقم کے طور پر بنائے گئے۔پولیس کے مطابق چونکا دینے والی بات یہ سامنے آئی ہے کہ خورشید احمد وازہ عرف منڈیلاکا پورا خاندان بشمول چند خواتین منشیات فروشی کی سرگرمیوں میں ملوث ہیں۔ خاندان کے مختلف افراد کے خلاف پہلے ہی مختلف NDPS مقدمات کے تحت مقدمہ درج کیا گیا ہے، جن میں سے کچھ نے حال ہی میں ضمانت حاصل کر لی ہے جبکہ دیگر سلاخوں کے پیچھے ہیں۔پولیس حکام نے کہاکہ ہم بانڈی پورہ سے منشیات کی اسمگلنگ کو ختم کرنے کے اپنے مشن میں پرعزم ہیں۔ایک اعلیٰ پولیس افسر نے کہاکہ یہ تازہ ترین کریک ڈاؤن بانڈی پورہ پولیس کی جانب سے علاقے میں کام کرنے والے منشیات کے نیٹ ورک کو ختم کرنے کے لیے کی جانے والی انتھک کوششوں کی نشاندہی کرتا ہے۔انہوںنے کہاکہ اثاثوں کی ضبطی، پورے خاندان کے خلاف اندیشے اور قانونی کارروائی کے ساتھ، بانڈی پورہ میں منشیات کی تجارت میں ملوث افراد کو ایک مضبوط پیغام بھیجتی ہے۔حکام نے مزید کہاکہ پولیس اس لعنت کو جڑ سے اکھاڑ پھینکنے اور رہائشیوں کے لئے ایک محفوظ اور منشیات سے پاک ماحول کو یقینی بنانے کے لیے پرعزم ہے۔
