ٹریجری اکاؤنٹنٹ کے خلاف سرزنش کی سزا
سرینگر// یو این ایس / جموں و کشمیر حکومت کے محکمہ خزانہ نے ضلع ٹریژری دفتر کپواڑہ میں تعینات اکاؤنٹنٹ سجاد احمد خان کے خلاف ایک مبینہ غیر قانونی رشوت طلب کرنے کے معاملے میں محکمانہ کارروائی کرتے ہوئے ’’سرزنش‘‘ کی سزا عائد کرنے کا حکم دیا ہے۔حکومت کے حکم نامہ نمبر 276-F آف 2026، مورخہ 3 ستمبر 2026 کے مطابق سجاد احمد خان کے خلاف کارروائی ایک زبانی شکایت کی بنیاد پر شروع ہوئی تھی، جس میں الزام لگایا گیا تھا کہ انہوں نے ایک ٹھیکیدار سے غیر قانونی رشوت طلب کی تھی۔اس معاملے کی تحقیقات ڈائریکٹر اکاؤنٹس اینڈ ٹریژریز کشمیر کی جانب سے 16 جون 2026 کو جاری کردہ حکم کے تحت ضلع ٹریژری دفتر کپواڑہ کے ٹریژری افسر نے کی۔تحقیقات کے دوران متعلقہ ریکارڈ کا جائزہ لینے کے علاوہ متعلقہ افراد کے بیانات بھی قلمبند کیے گئے۔ تحقیقاتی رپورٹ میں کہا گیا کہ غیر قانونی رشوت طلب کرنے اور قبول کرنے کا الزام ثابت نہیں ہوسکا، کیونکہ اس سلسلے میں دستاویزی یا آزادانہ طور پر تصدیق کرنے والا کوئی ثبوت دستیاب نہیں تھا۔تاہم تحقیقاتی افسر نے سجاد احمد خان کے عوام کے ساتھ معاملات سے متعلق طرز عمل میں بعض خامیوں کی نشاندہی کی۔ رپورٹ کے مطابق ان کا یہ طرز عمل ایک سرکاری ملازم سے متوقع ضابطہ اخلاق اور معیار کے مطابق نہیں تھا۔تحقیقاتی رپورٹ کی بنیاد پر ڈائریکٹر اکاؤنٹس اینڈ ٹریژریز کشمیر نے جموں و کشمیر سول سروسز (درجہ بندی، کنٹرول اور اپیل) قواعد 1956 کے ضابطہ 30(i) کے تحت ’’سرزنش‘‘ کی معمولی سزا عائد کرنے کی سفارش کی۔یہ سفارش مجاز اتھارٹی کے سامنے تحقیقات کے نتائج پر غور اور منظوری کے لیے پیش کی گئی، جس کے بعد محکمہ خزانہ نے سجاد احمد خان کے خلاف مذکورہ سزا عائد کرنے کی منظوری دے دی۔حکومت جموں و کشمیر کی جانب سے جاری حکم پر محکمہ خزانہ کے مالیاتی کمشنر (ایڈیشنل چیف سیکریٹری) شیلندر کمار، آئی اے ایس نے دستخط کیے ہیں۔حکم نامے کی نقول وزیر اعلیٰ جموں و کشمیر کے ایڈیشنل چیف سیکریٹری اور وزارت داخلہ، حکومت ہند، نئی دہلی کے جوائنٹ سیکریٹری (جموں و کشمیر) کو بھی اطلاع کے لیے ارسال کی گئی ہیں۔اہم بات یہ ہے کہ تحقیقاتی رپورٹ کے مطابق سجاد احمد خان پر غیر قانونی رشوت طلب کرنے اور قبول کرنے کا الزام ثابت نہیں ہوا، تاہم عوام کے ساتھ برتاؤ سے متعلق بعض خامیوں کی بنیاد پر انہیں ’’سرزنش‘‘ کی سزا دی گئی ہے۔
