سرینگر//وزیر برائے تعلیم ، سماجی بہبود ، صحت اور طبی تعلیم محترمہ سکینہ ایتو نے SCERT بمنہ میں ALOHA GAT – 2025 کے اعلیٰ کارکردگی کا مظاہرہ کرنے والوں اور کامیابی حاصل کرنے والوں کو مبارکباد دی ، جس کا اہتمام طلباء میں تعلیمی فضیلت اور مسابقتی جذبے کو پہچاننے اور منانے کیلئے کیا گیا تھا ۔ اس موقع پر ڈائریکٹر سکول ایجوکیشن کشمیر ، ڈائریکٹر سینٹر فار گُڈ گورننس آئی یو ایس ٹی ، جوائینٹ ڈائریکٹر سکول ایجوکیشن ( سنٹرل ) ، سی ای او سرینگر ، اے ایل او ایچ اے سرینگر کی سینئر انتظامیہ ، طلباء اور والدین کی بڑی تعداد بھی موجود تھی ۔ اجتماع سے خطاب کرتے ہوئے وزیر موصوفہ نے کہا کہ یہ انوکھا امتحان نہ صرف ذہانت کے بارے میں ہے بلکہ یہ طلبہ کی زندگی کی مختلف جبلتوں کو بھی ظاہر کرتا ہے ۔ وزیر نے کہا ’’ یہ امتحان نہ صرف آپ کی صلاحیتوں کو ظاہر کرتا ہے بلکہ یہ ایک بچے یا طالب علم کے مختلف پہلوؤں پر روشنی ڈالتا ہے ۔ یہ ذہنی ریاضی ، تجزیاتی سوچ ، ارتکاز اور طلباء میں مجموعی علمی نشو و نما کو مضبوط کرتا ہے ۔ ‘‘ وزیر موصوفہ نے مزید کہا کہ جموں و کشمیر کے بچوں میں بہت زیادہ ٹیلنٹ موجود ہے ۔ انہوں نے کہا کہ ڈیڑھ سال سے میں محکمہ تعلیم کی دیکھ بھال کر رہی ہوں اور میں یہ کہنے میں ہچکچاہٹ محسوس نہیں کروں گی کہ ہمارے بچوں میں ٹیلنٹ کی سطح بے مثال ہے ۔ انہیں آگے بڑھنے کا موقع اور راستہ دینے کی ضرورت ہے ، وہ مواقع پیدا کریں گے ۔ کامیابی حاصل کرنے والوں کو مبارکباد دیتے ہوئے وزیر نے ابتدائی مرحلے میں ٹیلنٹ کو پروان چڑھانے اور مستقبل کے تعلیمی چیلنجوں کیلئے طلباء کو تیار کرنے کیلئے ایسے مساطقتی پلیٹ فارمز کی اہمیت پر زور دیا ۔ انہوں نے کہا کہ اے ایل او ایچ اے جی اے ٹی جیسی سرگرمیاں نہ صرف عددی صلاحیت کو بڑھاتی ہیں بلکہ اعتماد ، رفتار اور درستگی کو بھی فروغ دیتی ہیں بلکہ اعتماد ، رفتار اور درستگی کو بھی فروغ دیتی ہیں جو کہ جدید تعلیمی نظاموں میں کامیابی کیلئے ضروری اولین خصوصیات ہیں ۔ تقریب کے دوران وزیر موصوفہ نے ہونہار طلباء میں ان کی کامیابیوں پر سرٹیفکیٹس اور میمنٹوز تقسیم کئے ۔
