سرینگر//جموں و کشمیر حکومت جس کی قیادت وزیر اعلیٰ مسٹر عمر عبداللہ کر رہے ہیں ، نے جموں میں دو بڑے پارکنگ انفراسٹرکچر منصوبوں کیلئے انتظامی منظوری دی ہے جن کا مقصد ٹریفک کی بھیڑ کم کرنا اور شہر میں منصوبہ بند شہری انفراسٹرکچر کو مضبوط بنانا ہے ۔ منظور شدہ منصوبوں میں پریڈ پر ایک پارکنگ کم کمرشل کمپلیکس اور ایس ایم جی ایس ہسپتال جموں پر ایک ملٹی لیول کار پارکنگ کی سہولت شامل ہے جن کی مجموعی تخمینہ لاگت 49.34 کروڑ روپے ہے ۔ نئے پارکنگ انفراسٹرکچر سے مسافروں ، زائرین اور رہائشیوں کیلئے سہولت میں نمایاں اضافہ متوقع ہے ، خاص طور پر ان علاقوں میں جہاں گاڑیوں کی آمدورفت اور پارکنگ کا دباؤ زیادہ ہے ۔
