زیادہ تر کی عمر 18 سے 75 سال کے درمیان، 10سے17سال عمر کے ایک لاکھ68ہزار700 بچے بچیاں بھی شامل
سری نگر//مرکزی قائمہ کمیٹی برائے سماجی انصاف وعطائے اختیار نے پارلیمنٹ میں پیش کردہ اپنی تازہ رپورٹ میں اسبات کاانکشاف کیاہے کہ جموں و کشمیر میں ایک اندازے کے مطابق تقریباً13 لاکھ50ہزار افراد منشیات کا استعمال کرتے ہیں یاکہ منشیات کے عادی ہیں اور ان میں سے زیادہ تر کی عمر 18 سے 75 سال کے درمیان ہے۔مرکزی قائمہ کمیٹی نے منشیات کی اسمگلنگ، پیداوار اور تقسیم کو کنٹرول کرنے کیلئے تمام متعلقہ اداروں کے درمیان ہم آہنگی پر زور دیا ہے۔ جے کے این ایس کے مطابق لوک سبھا اور راجیہ سبھا کے 27 ارکان پر مشتمل قائمہ کمیٹی نے پارلیمنٹ کے دونوں ایوانوں میں پیش کی گئی اپنی رپورٹ میںبتایاکہ جموں وکشمیرمیں سال2018میں متوقع آبادی پر مبنی ایک اندازے کے مطابق وہاں تقریباً13 لاکھ48ہزار700 افراد منشیات کا استعمال کرتے ہیں یاکہ منشیات کے عادی ہیں،جن میں10سے17سال عمر کے بچوں کے علاوہ18سے75سال عمرکے بالغ افراد بھی شامل ہیں ۔کمیٹی نے بتایا کہ جموں و کشمیر میں اندازے کے مطابق 10سے17سال عمر کے تقریباً ایک لاکھ68ہزار700 بچے منشیات استعمال کرنے والے ہیں اور وہ کینابیس، اوپیئڈز، سیڈیٹیو، کوکین، ایمفیٹامین قسم کے محرکات (ATS)، سانس لینے والے ادویات اور ہیلوسینوجنز لے رہے ہیں۔ ان میں سے زیادہ تر لوگ اوپیئڈز اور سانس لینے والے ادویات استعمال کر رہے ہیں جب کہ دوسرے لوگ سکون آورادویات اور بھنگ لینے کے عادی ہیں۔ جہاں تک 18سے75سال کی عمر کے گروپ کا تعلق ہے، تومرکزی قائمہ کمیٹی برائے سماجی انصاف وعطائے اختیارنے پارلیمنٹ کو مطلع کیا ہے کہ جموں و کشمیر میںاس عمرکے گروپ میں آنے والے 11لاکھ80ہزار بالغ افراد منشیات استعمال کرتے ہیں اور ان میں سے زیادہ تر اوپیوڈز کے عادی ہیں، اس کے بعد بھنگ، نشہ وسکون آور ادویات اور سانس لینے والے ادویات شامل ہیں۔ اس کے ساتھ، جموں وکشمیر میں کل13 لاکھ48ہزار700 افراد منشیات استعمال کرنے والے ہیں اور یہ تعداد زیادہ ہوسکتی ہے کیونکہ یہ تخمینے 2018میں متوقع آبادی پر مبنی ہیں۔پیش کی گئی رپورٹ میں مزید بتایاگیاہے کہ جموں وکشمیرمیں منشیات اورنشہ آورادویات کے عادی افراد7قسم کے سائیکو ایکٹیو مادے جیسے کینابس، اوپیئڈز، کوکین، ایمفیٹامائن اسٹیمولنٹس، سیڈیٹیو، سانس لینے والے اور ہیلوسینوجنز کو متاثرین استعمال کرتے پائے گئے، اس کے علاوہ شراب جو کہ بالغوں کی طرف سے استعمال ہونے والا سب سے عام سائیکو ایکٹیو مادہ ہے۔نیشنل ایکشن پلان فار ڈرگ ڈیمانڈ ریڈکشن (NAPDDR) کے متعارف ہونے کے بعد منشیات کی لعنت پر قابو پانے کیلئے کئے جانے والے اقدامات کے بارے میں پوچھے جانے پر، قائمہ کمیٹی کو حکومت ہند کے سماجی انصاف اور بااختیار بنانے کے محکمے نے بتایا کہ فنڈز منشیات استعمال کرنے والوں کی دیکھ بھال اور بحالی کے بعد شناخت، ترغیب، مشاورت، نشے سے نجات کے لیے فراہم کیا جا رہا ہے۔ڈسٹرکٹ ڈی ایڈکشن سنٹرز کے قیام کے بارے میں، محکمہ نے اسٹینڈنگ کمیٹی کو مطلع کیا ہے کہ حکومت جموں و کشمیر کے ساتھ مشاورت کے ساتھ اس سمت میں تمام کوششیں کی جا رہی ہیں۔ قائمہ کمیٹی نے جموں و کشمیر میں منشیات کی سمگلنگ، پیداوار اور تقسیم کو کنٹرول کرنے کے لیے تمام متعلقہ ایجنسیوں کے درمیان تال میل پر زور دیا ہے۔قائمہ کمیٹی نے احتیاطی تعلیم، آگاہی پیدا کرنے، مشاورت، علاج اور متاثرہ افراد کی بحالی اور اس لعنت کے خاتمے میں معاشرے کی زیادہ سے زیادہ شمولیت کی اہمیت پر بھی روشنی ڈالی۔مزید یہ کہ انہوں نے مختلف پلیٹ فارمز نیز سیول سوسائٹی سے اپیل کی ہے کہ وہ اس سلسلے میں حکومت کی ہر ممکن مدد کریں کیونکہ یہ معاشرے کی اجتماعی ذمہ داری ہے کہ وہ ایسے نوجوانوں کی بازآبادکاری کریں جو پڑوسی ملک کی جانب سے منشیات کی لت کی سازش کا شکار ہو چکے ہیں۔انہوں نے جموں و کشمیر پولیس اور انسداد منشیات ٹاسک فورس کو پہلے ہی ہدایت دی ہے کہ وہ اس لعنت کے خلاف زیرو ٹالرنس پالیسی اپنائیں اور تمام متعلقہ ایجنسیوں کی اجتماعی کوششوں کی وجہ سے بڑی تعداد میں منشیات ضبط کی گئی ہیں۔
