اڈیشہ، میزورم، سکم اور منی پور میں ایس آئی آر کا آغاز

نئی دہلی//یواین آئی// الیکشن کمیشن نے اوڈیشہ، میزورم، سکم اور منی پور میں ووٹر فہرست کے خصوصی جامع نظرِ ثانی (ایس آئی آر) عمل کے تیسرے مرحلے کے تحت گنتی کا مرحلہ شروع کر دیا ہے ۔ کمیشن کی جانب سے اتوار کو جاری بیان میں کہا گیا کہ ان چار ریاستوں میں یہ مہم 30 مئی سے شروع ہو چکی ہے ۔ جن اہل ووٹروں کے فارم 28 جون یا اس سے پہلے متعلقہ افسر کے پاس جمع ہو جائیں گے ، ان کے نام ابتدائی ووٹر فہرست میں شامل کیے جائیں گے ۔ جو لوگ اس تاریخ تک فارم جمع نہیں کرا سکیں گے ، وہ بعد میں دعویٰ اور اعتراض کی مدت کے دوران ‘فارم 6’ کے ذریعے درخواست دے سکتے ہیں۔ مہم کے دوران بوتھ سطحی افسران (بی ایل او) گھر گھر جا کر فارم فراہم کر رہے ہیں۔ ووٹر یہ فارم بی ایل او کے پاس یا آن لائن جمع کرا سکتے ہیں۔ نئے ووٹروں کے لیے بی ایل او اپنے ساتھ خالی فارم-6 اور حلف نامہ بھی رکھیں گے ۔ سیاسی جماعتوں کی شمولیت بڑھانے کے لیے کمیشن نے تسلیم شدہ جماعتوں کے بوتھ لیول ایجنٹس (بی ایل اے ) کو عوام سے روزانہ زیادہ سے زیادہ 50 فارم جمع کر کے بی ایل او کے حوالے کرنے کی اجازت دی ہے ۔