نائب وزیر اعلیٰ نے گاندر بل ضلع میں ترقیاتی کاموں کی صورتحال کا جائیزہ لیا

سرینگر//نائب وزیر اعلیٰ مسٹر سریندر کمار چودھری نے سول سیکرٹریٹ میں ایک جامع جائیزہ اجلاس کی صدارت کی تا کہ گاندر بل ضلع میں آر اینڈ بی کے تحت مختلف ترقیاتی پروجیکٹوں کی صورتحال کا جائیزہ لیا جا سکے ۔ کنگن کے ممبر قانون ساز مہر علی کے علاوہ گاندر بل اور کنگن کے متعلقہ سینئر افسران اجلاس میں موجود تھے ۔ متعلقہ افسران نے نائب وزیر اعلیٰ کو آر اینڈ بی کے مختلف پروجیکٹوں کی صورتحال سے آگاہ کیا جو مختلف مراحل میں زیر عمل ہیں ۔ ٍنائب وزیر اعلیٰ نے افسران کو ہدایت دی کہ وہ اہم پروجیکٹوں کو وقت پر مکمل کریں اور تمام مسائل کو فوری طور پر حل کرنے کی ضرورت پر زور دیا تا کہ ان کی بروقت تکمیل یقینی بنائی جا سکے ۔ اجلاس کے دوران نائب وزیر اعلیٰ نے افسران سے کہا کہ وہ عوامی مسائل کے تیز اور موثر حل کیلئے فعال رویہ اپنائیں ۔ ضلع کی ترقیاتی کوششوں کی حمایت کے اپنے عزم کا اعادہ کرتے ہوئے نائب وزیر اعلیی نے مختلف اسکیموں کے تحت کاموں کی تکمیل میں تاخیر کے بارے میں خبر دار کیا اور گاندر بل میں کاموں کی عملدرآمد کو تیز کرنے کی ضرورت پر زور دیا ۔