ایل جی منوج سنہا نے حفاظتی انتظامات مزید سخت کرنے کی ہدایت دی
سرینگر/وی او آئی//جموں و کشمیر کے لیفٹیننٹ گورنر منوج سنہا نے امر ناتھ یاترا کے دوران چندر کوٹ کے قریب پیش آئے ایک حادثے کے بعد متعلقہ حکام کو ہدایت دی ہے کہ یاتریوں کی حفاظت کو یقینی بنانے کے لیے تمام اہم مقامات پر حفاظتی انتظامات کا از سر نو جائزہ لیا جائے۔وائس آف انڈیا کے مطابق یہ حادثہ اس وقت پیش آیا جب پہلگام کی جانب جانے والی ایک گاڑی کے بریک فیل ہو گئے، جس کے باعث وہ دیگر کھڑی گاڑیوں سے جا ٹکرائی۔ واقعے میں 36 یاتری معمولی زخمی ہوئے، جنہیں ابتدائی طبی امداد فراہم کرنے کے بعد فارغ کر دیا گیا، اور وہ دوبارہ اپنی یاترا کے لیے روانہ ہو چکے ہیں۔ایل جی منوج سنہا نے کہا، “بھگوان شیو کی مہربانی سے تمام یاتری محفوظ ہیں۔” انہوں نے مزید کہا کہ یاتریوں کی سلامتی حکومت کی اولین ترجیح ہے اور اس مقصد کے لیے یاترا روٹ کے تمام اہم مقامات پر سخت حفاظتی جانچ کی جائے۔انہوں نے متعلقہ محکموں کو ہدایت دی کہ یاتریوں کو کھانے، ادویات اور دیگر لازمی سہولیات بلا تعطل فراہم کی جائیں۔حادثے کے فوراً بعد ایل جی سنہا نے جموں کے ڈویڑنل کمشنر رمیش کمار اور ضلع رامبن کے ڈپٹی کمشنر محمد الیاس خان سے بات کی اور زخمی یاتریوں کو ہر ممکن مدد فراہم کرنے کی ہدایت دی۔ انہوں نے سینئر حکام کو الرٹ رہنے اور یاترا کے دوران مؤثر انتظامات برقرار رکھنے کی ہدایت بھی دی۔لیفٹیننٹ گورنر نے ضلعی انتظامیہ اور محکمہ صحت کی فوری کارروائی کو سراہا، جس کی بدولت حادثے کے سنگین نتائج سے بچا جا سکا۔
