عوام کارول قابل تعریف، سیکورٹی فورسز اور انٹیلی جنس ایجنسیوںکومبارکباد :ڈی جی پی،اے ڈی جی پی کشمیر
سری نگر//سری نگرمیں پیر سے بدھ تک منعقدہ 3روزہ جی20ٹورازم ورکنگ گروپ کی تیسری میٹنگ میں شامل ہوئے ملکی اور غیرملکی مندوبین جمعرات کوسری نگرسے نئی دہلی روانہ ہوگئے ۔اعلیٰ پولیس حکام نے بین الااقوامی تقریب کے پُرامن اوربغیر کسی واقعے کے انعقاد پر اطمینان ظاہر کرتے ہوئے عوام کی تعریف کی ،اورساتھ ہی جملہ سیکورٹی فورسز اور انٹیلی جنس ایجنسیوںکومبارکباد پیش کی ۔پولیس حکام نے کہاکہ جعلی کشمیرمخالف اورامن مخالف بیانیہ ناکام ہوگیا اورجی20تقریب نے نئے امکانات اور اُمیدوںکی راہیں کھول دی ہیں۔جے کے این ایس کے مطابق عہدیداروں نے بتایا کہ جی20 کے تمام مندوبین جمعرات کو صبح 10بجکر20منٹ پر4ڈ فلائٹ میں سری نگر کے بین الاقوامی ہوائی اڈے سے دہلی کے لئے روانہ ہو ئے۔جی20ٹورازم ورکنگ گروپ کے مندوبین نے پیر سے بدھ تک ٹورازم ورکنگ گروپ کا تیسرا اجلاس منعقد کیا۔منگل اور بدھ کو، مندوبین نے سری نگر کے خوبصورت مقامات کا دورہ کیا، جن میں 18 ہول رائل سپرنگ گالف کورس اور نشاط مغل گارڈن شامل ہیں۔پرجوش مندوبین نے روایتی کشمیری لباس میں تصاویر کھنچوائیں اور بعد میں شہر کے تمام پیدل چلنے والے پولو ویو مارکیٹ میں خریداری کی۔انہوں نے مقامی دستکاری میں گہری دلچسپی لی اور وادی کے اپنے اہم دورے کی یادداشتوں کے طور پر گھر لے جانے کیلئے کچھ چیزیں خریدیں،جن میںپیپرماشی سامان ، پشمینہ شال، اخروٹ کی لکڑی کے نقش و نگار وغیرہ شامل تھے جنہوں نے دیکھنے والوں کی توجہ حاصل کی۔ سری نگرمیں G20ٹورازم ورکنگ گروپ کی3روزہ میٹنگ کے پُرامن اورخوشگوار انعقاد پراطمینان ظاہر کرتے ہوئے ڈائریکٹر جنرل جموں وکشمیرپولیس دلباغ سنگھ اورایڈیشنل ڈائریکٹر جنرل آف پولیس کشمیرزون وجے کمار نے عوام کیساتھ ساتھ جملہ سیکورٹی فورسز اور انٹیلی جنس ایجنسیوںکومبارکباد پیش کی ہے ۔پولیس کے ڈائریکٹر جنرل دلباغ سنگھ نے تین روزہ جی20 میٹنگ کے کامیاب اختتام پر عوام کی تعریف کی ہے اور پولیس اور سیکورٹی فورسز کو مبارکباد دی ہے۔جموں و کشمیر پولیس نے جمعرات کو ایک بیان میں کہاکہ تین روزہ جی20 کا تاریخی پروگرام جمعرات کو مندوبین کی واپسی کے ساتھ اختتام پذیر ہو گیا، لیکن جموں و کشمیر کے لوگوں کیلئے طویل عرصے تک یاد رکھنے والی تمام اچھی یادیں اپنے پیچھے چھوڑ گیا۔بیان میں کہاگیاکہ اس بین الااقوامی تقریب نے بہت سی خرافات کی مذمت کرتے ہوئے جھوٹ پر مبنی اور پڑوسی ملک کی طرف سے پروپیگنڈہ کئے جانے والے جعلی کشمیر مخالف اور امن مخالف بیانیے کو بے نقاب کردیاہے اور نئے امکانات اور اُمیدوںکی راہیں کھول دی ہیں۔ ڈائریکٹر جنرل جموں وکشمیرپولیس دلباغ سنگھ نے کہاکہ کشمیر کے لوگ پاکستانی بیانیے کے جھوٹ کو دیکھنے اور اس تقریب میں دل و جان سے ہر طرح سے شرکت کرنے پر خصوصی تعریف کے مستحق ہیں۔ انہوںنے کہا کہ مندوبین نے نہ صرف کشمیر کی خوبصورتی سے لطف اندوز ہوئے بلکہ مقامی لوگوں اور ان کی مہمان نوازی کی بھی تعریف کی۔تین روزہ تقریب کے لئے کئے گئے حفاظتی انتظامات کم سے کم رکاوٹ والے تھے، جو لوگوں کیلئے مکمل معمول کی زندگی اور کاروبار کو یقینی بناتے تھے۔ سیکورٹی کے پیش نظر ہر جگہ ٹریفک اور تمام کاروباری سرگرمیاں بغیر کسی تکلیف کے جاری رہیں۔پولیس نے کہاکہ لوگوں نے پولیس اورسیکورٹی فورسز، ٹریفک اور سیکورٹی کے ضوابط کے ساتھ مکمل تعاون کیا جس کیلئے ڈی جی پی دلباغ سنگھ نے عوام کا شکریہ ادا کیا۔بیان کے مطابق یہ G20 ایونٹ لوگوں کا ایونٹ بن گیا جس نے دنیا کے مہمانوں کیلئے مقامی آرٹم ،کرافٹ اور مہمان نوازی کی روایات کو ظاہر کیا جو سیاحوں ومندوبین کی توجہ کے اہم مقامات پر گئے تھے، جس میں دنیا کے مشہور نشاط باغ، پیرمحل، ڈل جھیل میں شکارا کی سواری اورپولو ویو خریداری شامل ہیں۔ بیان میں مزید کہا گیا ہے کہ پولیس اورسیکیورٹی فورسز کا انتظام عوام دوست تھا۔ ڈی جی پی نے جی20 کے فرائض میں شامل پولیس،مرکزی پولیس فورسز اور دیگر ایجنسیوں کے تمام رینکوں کا شکریہ ادا کیا اور مبارکباد دی جنہوں نے گزشتہ 3 دنوں کے دوران کشمیر میں جی20 ایونٹ کو ایک ہموار اور محفوظ بنانے کے لئے بہترین کام کیا۔ادھر ایڈیشنل ڈائریکٹر جنرل آف پولیس کشمیرزون وجے کمار نے G20میٹنگ کے پُرامن انعقاد پرسیکورٹی فورسزاورایجنسیوں کو مبارکباد دی۔کشمیر کے ایڈیشنل ڈائریکٹر جنرل آف پولیس وجے کمار نے جمعرات کو سیکورٹی فورسز اور انٹیلی جنس ایجنسیوں کو ایک واقعہ سے پاک اور کامیابG20 میٹنگ کے انعقاد پر مبارکباد دی۔تیسرا جی 20 ٹورازم ورکنگ گروپ اجلاس جو پیر کو زمین سے فضا میں بے مثال سیکورٹی کور کے درمیان منعقد ہواشروع ہوا تھا،اوربدھ کواختتام پذیرہوا۔حکام نے بتایاکہ سری نگر میں ہونے والی میٹنگ میں تقریباً 60 غیر ملکی مندوبین نے شرکت کی۔انہوںنے کہاکہ G20 اجلاس اگست2019 کے بعد جموں و کشمیر میں پہلا بڑا بین الاقوامی پروگرام تھا۔تین روزہ کانفرنس بدھ کو اختتام پذیر ہوئی اور جمعرات کی صبح غیر ملکی مندوبین چارٹرڈ فلائٹ سے دہلی کے لئے روانہ ہوئے۔پُرامن اورکامیاب تین روزہ پروگرام کے بعد، اے ڈی جی پی کشمیر وجیکمار کمار نے واقعات سے پاک G20 اجلاس کو یقینی بنانے کے لیے افسران کو مبارکباد دی۔پولیس نے ایک ٹویٹ میں کہاکہ اے ڈی جی پی کشمیر وجے کمار(آئی پی ایس )نے جموں وکشمیرپولیس، سی آرپی ایف، آرمی، بی ایس ایف۔ایس ایس بی،این ایس جی ،مارکوس،این ڈی آرایف اور انٹیلی جنس ایجنسیوں کے افسران اور جوانوں کو واقعہ سے پاک اور کامیاب G20 اجلاس کے انعقاد پر مبارکباد دی ہے۔
