قانون اَفسران اور عملہ نے سینئر ایڈوکیٹ جاوید احمد کاووسہ کے اِنتقال پر اِظہارِ تعزیت کیا

سری نگر/ /قانون اَفسران اور عملہ کے اَرکان نے سینئر ایڈوکیٹ جاوید احمد کاووسہ کے اِنتقال پر گہرے دُکھ کا اِظہار کیا ہے جن کا کل یہاں اِنتقال ہواہے۔اِس سلسلے میں منعقدہ ایک تعزیتی میٹنگ میں ایڈیشنل ایڈ وکیٹ جنرل ایم اے چاشو نے مرحوم کے اَچانک اِنتقال پر گہرے دُکھ اور صدمے کا اِظہار کرتے ہوئے کہا کہ یہ خطے کے قانون کے لئے ایک بہت بڑا نقصان ہے ۔ تمام شرکا ء نے سری نگر ہائی کورٹ کے سامنے حکومت کی نمائندگی کرنے میں سینئر ایڈیشنل ایڈ وکیٹ جنرل کی حیثیت سے مرحوم جاوید احمد کاووسہ کی اَنمول خدمات کو یاد کیا اور ان کی تعریف کی۔اُنہوں نے مرحوم کی روح کے ابدی سکون اور سوگوار کنبے کے لئے صبر و جمیل کی دعا کی۔
اِسی طرح کے تعزیتی میٹنگ جموں کے دفتر میں ایڈ وکیٹ جنرل کی صدارت میں منعقد ہوئی جس میں سرکاری وکلأ، اَفسران اور ملازمین نے مرحوم کو زبردست خراجِ عقیدت پیش کیا۔میٹنگ میں شرکت کرنے والوں میں ایڈیشنل ایڈوکیٹ جنرل آصفہ پڈرو ، ایڈیشنل ایڈ وکیٹ جنرل ستیندر سنگھ کالا ، ڈپٹی ایڈوکیٹ جنرل عرفان عندلیب ، ڈپٹی ایڈوکیٹ جنرل فیروز احمد شیخ ، ڈپٹی ایڈ وکیٹ جنرل اوتار سنگھ سوڈھی اور اِنتظامی آفیسر زیڈ اے دیوانی اور تمام سرکاری وکلأ شامل تھے۔