سرینگر//زرعی جدیدیت اور فارم کی پیداواریت میں اضافے کی جانب ایک اہم پیش رفت میں چیف سیکرٹری مسٹر اتل ڈولو نے آج پردھان منتری راشٹریہ کرشی وکاس یوجنا ( پی ایم ۔ آرکے وی وائی ) کے سب مشن آن ایگریکلچرل میکانائزیشن ( ایس ایم اے ایم ) جزو کے تحت 2026-27 کیلئے 13.76 کروڑ روپے مالیت کا نظر ثانی شدہ سالانہ ایکشن پلان ( اے اے پی ) منظور کر لیا ۔ اجلاس میں ایڈیشنل چیف سیکرٹری ایگریکلچر پروڈکشن ڈیپارٹمنٹ ، سیکرٹری رورل ڈیولپمنٹ ڈیپارٹمنٹ ، سیکرٹری پلاننگ ، سیکرٹری اے پی ڈی ، ایگریکلچر پروڈکشن ڈیپارٹمنٹ کے محکموں کے سربراہان اور دیگر متعلقہ افسران نے شرکت کی ۔ جموں و کشمیر میں زرعی پیداواریت کو بہتر بنانے میں آبپاشی کے اہم کردار پر زور دیتے ہوئے چیف سیکرٹری نے زراعت کے شعبے کو مضبوط بنانے اور کسانوں کو اس کی مکمل صلاحیت سے مستفید ہونے کے قابل بنانے کیلئے آبپاشی اسکیموں پر توجہ دینے کی ضرورت پر زور دیا ۔ انہوں نے محکمہ زراعت پیداوار کو مشورہ دیا کہ وہ پردھان منتری کرشی سنچائی یوجنا ( پی ایم کے ایس وائی ) ، ایکسلریٹڈ اریگیشن بینیفٹس پروگرام ( اے آئی بی پی ) ، ڈرپ آبپاشی اور کمانڈ ایریا ڈیولپمنٹ جزو کے تحت کلیدی اقدامات کو آگے بڑھائے ۔ انہوں نے پانی کے استعمال کی کارکردگی بہتر بنانے ، آبپاشی کے دائرہ کار کو وسعت دینے اور زرعی زمین کے بہترین استعمال کو یقینی بنانے میں ان اقدامات کی اہمیت کو اجاگر کیا ۔ چیف سیکرٹری نے زور دیا کہ میکانائیزیشن اور آبپاشی کو ہم آہنگی کے ساتھ آگے بڑھنا چاہئیے تا کہ فارم کی کارکردگی میں اضافہ ہو ، فصلوں کی پیداواریت بہتر ہو اور جموں و کشمیر کی مجموعی زرعی معیشت کو مضبوط کیا جا سکے ۔ جموں و کشمیر کے چیف سیکرٹری کی صدارت میں ریاستی سطح کی منظوری کمیٹی ( ایس ایل ایس سی ) نے جو منصوبہ منظور کیا ہے اس کا مقصد جدید زرعی مشینری تک رسائی کو بڑھانا ، آپریشنل کارکردگی بہتر بنانا اور جموں و کشمیر بھر میں ٹیکنالوجی پر مبنی زرعی طریقوں کو فروغ دینا ہے ۔
