2 ستمبر سے موسم میں بہتری کا امکان، وسط ستمبر کے بعد گرمی میں کمی متوقع
سری نگر/یو این ایس / جموں و کشمیر میں پیر کی سہ پہر اور شام کے اوقات میں تیز ہواؤں کے ساتھ بارش ہونے کا امکان ہے، جبکہ آئندہ دو روز کے دوران بھی موسم کی یہی صورتحال برقرار رہنے کی توقع ہے۔ محکمہ موسمیات کے سری نگر مرکز کے ڈائریکٹر مختار احمد نے یہ اطلاع دی۔مختار احمد نے بتایا کہ جموں ڈویژن کے بعض علاقوں میں شدید بارش ہوسکتی ہے، جس کے نتیجے میں حساس اور پہاڑی علاقوں میں مٹی کے تودے گرنے کا خدشہ بھی موجود ہے۔انہوں نے کہا کہ اس دوران وادی کشمیر کے مختلف علاقوں میں بھی مختصر وقفوں کے ساتھ بارش اور گرج چمک کے ساتھ بوندا باندی ہوسکتی ہے۔محکمہ موسمیات کے مطابق 2 ستمبر سے موسم میں بہتری آنے کا امکان ہے اور 10 ستمبر تک مجموعی طور پر موسم زیادہ تر مستحکم رہنے کی توقع ہے۔ اس دوران کسی بڑی بارش کی پیش گوئی نہیں کی گئی، تاہم بعض مقامات پر مختصر دورانیے کی ہلکی بارش کو خارج از امکان قرار نہیں دیا جاسکتا۔محکمہ موسمیات کے ڈائریکٹر نے بتایا کہ متوقع بارش کے بعد زیادہ سے زیادہ درجہ حرارت میں کمی آنے کا امکان ہے۔ انہوں نے کہا کہ وسط ستمبر کے بعد موسمی حالات میں تبدیلی کے ساتھ جموں و کشمیر کے بیشتر علاقوں میں درجہ حرارت بتدریج کم ہونا شروع ہوجائے گا۔محکمہ موسمیات کے مطابق فی الحال جموں و کشمیر میں گرم اور مرطوب موسم برقرار رہنے کا امکان ہے، تاہم آئندہ ہفتوں میں موسم کی تبدیلی کے ساتھ درجہ حرارت میں بتدریج کمی متوقع ہے۔
