گونڈہ/یو این آئی/ اتر پردیش کے ضلع گونڈہ کے دورے پر آئے انچارج وزیر آشیش پٹیل نے اتوار کے روز کہا ہے کہ “میں پیپر لیک کے معاملے میں شامل نہیں ہوں”۔انہوں نے میڈیا سے بات چیت کرتے ہوئے واضح کیا کہ پیپر لیک کے معاملے سے ان کا کوئی لینا دینا نہیں ہے ۔ انہوں نے کہا کہ جو بھی لوگ اس معاملے میں ملوث ہوں گے ، ان کے خلاف سخت کارروائی کے لیے حکومت پرعزم ہے اور کارروائی کی بھی جا رہی ہے ۔ انہوں نے کہا کہ اس بار امتحانات انتہائی سخت انتظامات کے ساتھ منعقد کیے جائیں گے ۔ انہوں نے صاف طور پر کہا کہ رام مندر میں مبینہ چندہ گھوٹالے کی جانچ کے لیے وزیر اعلیٰ یوگی آدتیہ ناتھ نے رام مندر ٹرسٹ کے مطالبے پر ایس آئی ٹی تشکیل دے دی ہے ، جو دودھ کا دودھ اور پانی کا پانی کر دے گی اور قصورواروں کے خلاف سخت کارروائی کی جائے گی۔ضلع کی خستہ حال سڑکوں، طبی سہولیات اور بجلی کی لائنوں میں خامیوں کے سوال پر انہوں نے کہا کہ وہ ضلع انتظامیہ سے بات کر کے اس پورے معاملے کو جلد ہی حل کریں گے ۔ انہوں نے مودی حکومت کے 12 سالہ دورِ حکومت کا ذکر کرتے ہوئے حکومت کی کامیابیوں کی تعریف کی۔انہوں نے سماجوادی پارٹی (ایس پی) کے سربراہ اکھلیش یادو کی بیٹی ادیتی یادو کے خلاف سوشل میڈیا پر کئے گئے نازیبا تبصرے کے معاملے پر کہا کہ “ادیتی صرف اکھلیش یادو کی ہی نہیں بلکہ ہم سب کی بیٹی ہے ، جس کی سکیورٹی کے ساتھ ساتھ تمام خواتین کی سکیورٹی حکومت کی ذمہ داری ہے ۔”
