مسلم پرسنل لاء بورڈ ممبران سے کی ملاقات ،مختلف مسائل پر کی بات
سرینگر / /مفتی اعظم جموں و کشمیر مفتی ناصر الاسلام نے حال ہی میں راجوری اور پونچھ کے دو اضلاع کا دورہ کیا اور پیر پنجال خطہ میں مذہبی اور کمیونٹی اداروں کے ساتھ اپنی رسائی اور مصروفیت کو جاری رکھا۔کشمیر پریس سروس کے موصولہ بیان کے مطابق راجوری اور پونچھ دورہ کے دوران مفتی اعظم موصوف نے کئی دارالعلوموں اوراسلامی مدارس کا جائزہ لیا۔ انہوں نے ان دینی اداروں میں علمائے کرام، اساتذہ اور طلبہ سے بات چیت کی۔ان کی یہ مصروفیات مذہبی تعلیم کو مضبوط بنانے، نوجوان نسل کی رہنمائی اور کمیونٹی کو درپیش عصری چیلنجوں سے نمٹنے پر مرکوز تھیں۔اپنے خطابات کے دوران مفتی اعظم مفتی ناصرالاسلام نے کہا کہ نئی نسل کو دینی علوم کے ساتھ ساتھ عصری تقاضوں کی طرف بھی توجہ دلانے کی ضرورت ہے ۔انہوں نے کہا کہ موجودہ دور انتہائی مشکل ہے اور اس دورپُرآشوب میںہر اعتبار سے متحرک رہنے کی ضرورت ہے ۔انہوں نے کہا کہ کتابوں یا مدرسوں سے تعلیم حاصل کی جارہی ہے لیکن سوسائٹی میں اس علمی تربیت کو عملی جامہ پہنانے کی ضرورت ہے ۔اس دورہ کے دوران مفتی اعظم نے مسلم پرسنل لاء بورڈ کے معزز ممبران سے بھی ملاقات کی، جس میں اسلامی فقہ، سماجی ہم آہنگی اور کمیونٹی ویلفیئر سے متعلق امور پر بات چیت کی۔ اس طرح کے تعلقات مقامی مذہبی قیادت کو وسیع تر قومی نقطہ نظر سے ہم آہنگ کرنے میں اہم کردار ادا کرتے ہیں۔یہ دورہ جموں و کشمیر کی پیر پنجال پٹی میں اتحاد کو فروغ دینے، بامعنی مذہبی رہنمائی فراہم کرنے اور تعلیمی اداروں کی حمایت کے لیے جاری کوششوں کی عکاسی کرتا ہے اور مفتی اعظم کی سرگرمیاں اس حوالے سے آئندہ بھی جاری رہیں گی اور وادی کشمیر کے درسگاہوں ،دارالعلوموں کے علاوہ سرکاری ونجی اسکولوں کا بھی دورہ کرکے موجودہ صورتحال سے متعلق طلبہ سے بات چیت کریں گے اور ان کو موجودہ فتنوں سے دور رہنے کیلئے وعظ ونصیحت کرتے رہیں گے ۔
