پولیس نے گرفتار شدگان سے مالہ مسروقہ برآمد کرکے پوچھ تاچھ شروع کی
سرینگر //پولیس نے جموں میں مختلف چوری کی وارداتوں میں ملوث تین افراد کی گرفتاری عمل میں لاکر ان مجرموں سے مالہ مسروقہ برآمد کرنے کا دعویٰ کیا ہے ۔ سی این آئی کے مطابق جموں و کشمیر پولیس نے جموں و کشمیر میں جرائم، مجرمانہ سرگرمیوں پر لگام لگانے کی اپنی مہم کو جاری رکھتے ہوئے پولیس سٹیشن گاندھی نگر اور پولس چوکی ناروال کے دائرہ اختیار میں چوری کے دو مختلف مقدمات میں تین ڈاکوؤں کو گرفتار کیا ہے۔ اور مسروقہ گاڑیوں کی بازیابی عمل میںلائی ۔پولیس نے بتایا کہ انہیں گاندھی نگر پولس اسٹیشن میں ڈکیتی کی شکایت موصول ہوئی جس کے بعد پولیس ٹیم نے تحقیقات کے مقاصد کے لیے دو افراد کو پکڑ لیا۔ مشتبہ افراد کی شناخت روہت مہرا ساکنہ مبارک منڈی پکی ڈکی جموں کے طور پر ہوئی ہے جو موجودہ ریہڑی جموں میں اور سنیل کمار ساکنہ لین نمبر 24 فووارہ چوک گریٹر کیلاش جموں کے طور پر ہوئی ہے۔ذرائع کے مطابق پولیس نے بتایا کہ مسلسل پوچھ گچھ کے دوران ان دونوں نے اس جرم میں ملوث ہونے کا انکشاف کیا، اور ان کے انکشاف پر، مختلف مقامات سے ان کے قبضے سے سات چوری شدہ موٹر گاڑیاں برآمد کی گئیں۔ مزید برآں ان کے قبضے سے دو اسکوٹیز برآمد ہوئیں۔ایک اور چوری کا مقدمہ سنجوان جموں کے مکان نمبر 1 کے رہائشی شاہ محمد کی تحریری شکایت پر پولیس چوکی ناروال میں درج کیا گیا۔ شکایت کنندہ نے دعویٰ کیا کہ اس کا ٹرک جس کا رجسٹریشن نمبر JK21-B-9057 تھا نامعلوم افراد نے آٹو ایڈ پیٹرول پمپ ناروال، جموں سے چوری کیا۔ ایف آئی آر کے اندراج کے ساتھ ہی، پولس ٹیموں نے سخت کوششیں کیں اور علاقے کے سی سی ٹی وی فوٹیج کی مدد سے آخرکار ملزم راج کمار، جو ضلع ادھم پور کے سنیل مجالٹا کے رہنے والے ہیں، سے چوری کی گئی گاڑی برآمد کر لی۔
