متوفی پولیس اہلکاروں کے 40قریبی رشتہ داروں کی تقرری ،ڈی جی پی دلباغ سنگھ کااظہار تشکر

سری نگر//جموں و کشمیر پولیس کے ڈائریکٹر جنرل دلباغ سنگھ نے بدھ کو مرکزی وزارت داخلہ، جموں وکشمیرکے لیفٹنٹ گورنر منوج سنہا، مرکزی داخلہ سکریٹری اور دیگرحکام کا اسبات کیلئے شکریہ ادا کیا، جنہوں نے متوفی پولیس اہلکاروں کے 40 قریبی رشتہ داروں کی تقرری کے احکامات جاری کئے ہیں۔ جے کے این ایس کے مطابق جموں و کشمیرکے پولیس چیف دلباغ سنگھ نے مرکزی وزیر داخلہ امت شاہ، لیفٹنٹ گورنر منوج سنہا، مرکزی داخلہ سکریٹری اے کے بھلا، چیف سکریٹری ڈاکٹر ارون کمار مہتا، پرنسپل سکریٹری ہوم شالین کابرا اور مرکزی وزارت داخلہ اور جموں وکشمیرکے محکمہ داخلہ کے دیگر افسران کا متوفی پولیس اہلکاروںکے40 قریبی رشتہ داروںکی جموںوکشمیر کے مختلف محکموں میں ہمدردانہ تقرری کے احکامات جاری کرنے پر شکریہ ادا کیا ہے۔ جموں وکشمیر پولیس نے ٹویٹ میں مزید کہاکہڈی جی پی نے کہا ہے کہ یہ احکامات جاری کرنے سے ان خاندانوں کو بہت زیادہ ضروری مالی راحت ملے گی جنہوں نے قوم کی خودمختاری اور سالمیت اور جموں اورکشمیرکے لوگوں کے مفادات کی حفاظت کرتے ہوئے اپنے نگراں کو کھو دیا ہے۔ انہوں نے کہا کہ یہ تقرری ان خاندانوں کیلئے دیوالی کے تحفے کے طور پر کام کرے گی۔