کولگام //ضلع اِنتظامیہ کولگام نے لوگوں کی شکایات اور مسائل کے اُن کی دہلیز پر جلد از جلد ازالے کو یقینی بنانے کی کوششوں کو جاری رکھتے ہوئے آج ہفتہ وار ’بلاک دیوس‘ کے ایک حصے کے طور پر ضلع کے تین بلاکوں دیو سر ، کولگام اور ڈی ایچ پورہ میں عوامی رابطہ پروگراموں کا اِنعقاد کیا۔ضلع ترقیاتی کمشنرکولگام ڈاکٹر بلال محی الدین بٹ نے کولگام میں منعقدہ شکایات ازالہ کیمپ میں لوگوں کے مسائل کا جائزہ لیا۔شکایات ازالہ پروگرام میں کھلورہ، قیمو نئی بستی، ہادی گام، شوچ، کھنڈی پورہ، محمد پورہ، لیرو، میرہامہ، کاکراں اور دیگر علاقوں کے لوگوں نے شرکت کی جنہوں نے چیئر کے سامنے مختلف ترقیاتی اور فلاحی مطالبات رکھے۔مختلف علاقوں سے تعلق رکھنے والے پی آر آئی ممبران نے بھی اپنے علاقوں کے ترقیاتی مطالبات پیش کئے۔اَفسروں اور محکموں کے سربراہان نے اپنے محکموں سے متعلق لوگوں کے سوالات اور شکایات کا جوابات دئیے اور اُنہیں مختلف فلاحی سکیموں اور جاری ترقیاتی منصوبوں کے بارے میں آگاہ کیا۔ضلع ترقیاتی کمشنر نے کیمپ کے دوران اُٹھائے گئے عوامی مسائل کی سماعت کے بعد فوری نوعیت کی چند شکایات کا موقعہ پر ہی ازالہ کیا اور ان کے بروقت ازالہ کے لئے متعلقہ حلقوں کے ساتھ آرام کرنے کی یقین دہانی کی۔اِس موقعہ پر اُنہوں نے خطاب کرتے ہوئے عوام پر زور دیا کہ وہ بجلی کا صحیح اور منصفانہ استعمال کریں۔اِس موقعہ پر اے ڈی سی وقار احمد گیری، اے سی آر امتیاز العزیز، جے ڈی پی زاہد سجاد، اے سی ڈی محمد عمران، اے سی پی شرجیل علی اور دیگر ضلعی افسران وملازمین بھی موجود تھے۔
