ضلع ترقیاتی کمشنر ڈوڈہ نے نوجوانوں کو صحیح سمت میں لے جانے کیلئے سپورٹس کلچرکی اہمیت پر زور دیا

ڈوڈہ//ضلع ترقیاتی کمشنر ڈوڈہ ہرویندر سنگھ نے نوجوانوں کی صحیح سمت میں رہنمائی کے لئے سپورٹس کلچر کی اہمیت پر زور دیا۔اُنہوں نے اِن باتوں کا اِظہار آج دروناچاریہ چناب سپورٹس اکیڈیمی میں لڑکیوں اور لڑکوں کے داخلے کی نئی سہولیات کا اِفتتاح کرنے کے بعد مہمانوں سے خطاب کرنے کے دوران کیا۔اُنہوں نے اپنے خطاب میں نوجوانوں میں جسمانی فٹنس اور ٹیم سپرٹ کو فروغ دینے کے لئے کھیلوں کی اہمیت پر روشنی ڈالی۔ اُنہوںنے والدین کی حوصلہ افزائی کی کہ وہ صحت مند اور فعال طرزِ زندگی کو فروغ دینے کے لئے اَپنے بچوں کو کھیل پروگراموں میںشامل کریں۔ اُنہوں نے خطے میں نوجوان ایتھلیٹس کو جدید ترین سہولیات فراہم کرنے پر دروناچاریہ چناب سپورٹس اکیڈیمی کی سراہنا کی۔نئی اِفتتاحی سہولیات میں کرکٹ گراؤنڈ، باؤلنگ مشین، بیٹنگ ڈرل کے لئے پگز، کنکریٹ وِکٹ، ٹرف وکٹ، پریکٹس میچز، باقاعدگی سے فٹنس سیشنز اور 4 سے 20 برس کی عمر کے اَفراد کے لئے دیگر کھیل شامل ہیں۔اِفتتاحی تقریب میں پرنسپل جی ڈی سی عطار سنگھ کوتوال ، تحصیل دار سبحان احمد شاد کے علاوہ مقامی کمیونٹی کے طلبأ اور والدین بھی موجود تھے۔