عمرعبداللہ ،محبوبہ مفتی،غلام نبی آزاد،سجادغنی لون اورتاریگامی کاردعمل
سری نگر//وادی سابق وزرائے اعلیٰ عمرعبداللہ ،محبوبہ مفتی،سابق وزیر سجادغنی لون اوربی جے پی کی جموں وکشمیر شاخ کے ترجمان الطاف ٹھاکر نے گوپال پورہ کولگام میںہندئوخاتون ٹیچر کے قتل کی مذمت کرتے ہوئے کہاکہ کشمیر میں ٹارگٹ کلنگ کے واقعات میں اضافہ باعث تشویش ہے ۔جے کے این ایس کے مطابق سابق وزیراعلیٰ اورنیشنل کانفرنس کے نائب صدر عمر عبداللہ نے سماجی رابطہ گاہ ٹویٹر پر اپنے ایک ٹویٹ میں لکھا’’بہت دکھ کی بات۔غیر مسلح شہریوں پرکئے گئے حالیہ حملوں کی ایک طویل فہرست میں یہ ایک اور ٹارگٹ کلنگ ہے۔ مذمت اور تعزیت کے الفاظ کھوکھلے ہیں جیسا کہ حکومت کی یہ یقین دہانی ہے کہ وہ حالات کے معمول پر آنے تک آرام نہیں کریں گے۔ مرحوم کو سکون ملے‘‘۔انہوںنے آگے لکھاکہ خاتون ٹیچر رجنی کا تعلق جموں صوبے کے ضلع سانبہ سے تھا۔ جنوبی کشمیر کے کولگام علاقے میں کام کرنے والی ایک سرکاری ٹیچر، ایک نفرت انگیز ٹارگٹ حملے میں اپنی جان سے ہاتھ دھو بیٹھی۔ میرا دل اس کے شوہر راج کمار اور اس کے باقی خاندان کے لیے جاتا ہے۔ تشدد سے ایک اور گھر کو ناقابل تلافی نقصان پہنچا‘‘۔ایک اورسابق وزیراعلیٰ وپی ڈی پی کی صدر محبوبہ مفتی نے کہا کہ مرکز کے کشمیر میں حالات معمول پر لانے کے دعووں کے باوجود ٹارگٹ کلنگ میں اضافہ ہو رہا ہے۔ انہوں نے اپنے ایک ٹویٹ میں کہاکہ کشمیر کے نارمل ہونے کے بارے میں حکومت ہند کے جعلی دعووں کے باوجود یہ واضح ہے کہ ٹارگٹیڈ شہری ہلاکتیں بڑھ رہی ہیں اور تشویش کی گہری وجہ۔ انہوںنے مزیدکہاکہ اس بزدلی کے عمل کی مذمت کریں جو افسوسناک طور پر بی جے پی کے ذریعے پھیلائے گئے مسلم مخالف بیانیے میں کردار ادا کرتا ہے۔سابق کابینی وزیراورمسلم کانفرنس کے چیئرمین سجادغنی لون نے بھی خاتوں ٹیچر کے قتل کی مذمت کرتے ہوئے کہا کہ بزدلی ایک بار پھر بے شرمی کی گہرائیوں میں اتر گئی ہے۔انہوںنے کہاکہ کولگام میں سانبہ سے تعلق رکھنے والی ایک ٹیچر، ایک معصوم خاتون کو گولی مار کر ہلاک کر دیا گیا ہے۔ اس کی روح کو سکون ملے۔بی جے پی کے ترجمان الطاف ٹھاکر نے کہا کہ وہ اس حملے کی شدید مذمت کرتے ہیں۔ انہوں نے کہاکہ کولگام میں دہشت گردی کی ایک اور بزدلانہ کارروائی۔ غیر مسلح شہریوں پر حملہ کرنا، وہ بھی خواتین، کوئی بہادری نہیں بلکہ مایوسی کا عمل ہے۔اُدھر کانگریس کے سینئر لیڈر غلام نبی آزاد نے بھی اس حملے کی مذمت کی ۔غلام نبی آزادنے ایک ٹویٹ میں کہاکہ ’’میں کشمیر میں ایک ہفتے کے اندر دو خواتین، امرین بھٹ اور رجنی بالا کی ٹارگٹ کلنگ کے دل دہلا دینے والے واقعات کے بارے میں جان کر دکھی ہوں۔ میں رجنی بالا کے قتل کی شدید مذمت کرتا ہوں‘‘َ۔انہوںنے کہاکہ میں انتظامیہ پر زور دیتا ہوں کہ وہ معصوم شہریوں کی زندگیوں کے تحفظ کیلئے سخت اقدامات کرے۔غلام نبی آزاد نے مزیدکہاکہ میں سوگوار خاندانوں کے ساتھ اپنی ہمدردی کا اظہار کرتا ہوں۔سی پی آئی (ایم) لیڈر ایم وائی تاریگامی نے استاد کے قتل کو افسوسناک اور بدقسمتی قرار دیا۔انہوں نے کہاکہ یہ شہری ہلاکتوں کی طویل فہرست میں ایک اور اضافہ ہے۔ ایسا لگتا ہے کہ خونریزی کی کوئی انتہا نہیں ہے۔محمدیوسف تاریگامی نے کہاکہ انتظامیہ کو چاہیے کہ ان ملازمین کو محفوظ مقامات پر تعینات کرے اور انہیں محفوظ رہائش فراہم کرے۔
