پولیس اسٹیشنوں میں سے ایک کے طور پر منتخب کیا گیا
سرینگر//شیر گڑھی پولیس سٹیشن سرینگر کو ملک کے تین بہترین پولیس سٹیشنوں میں سے ایک قرارد یا گیا ہے اور اس ضمن میں وزارت کی جانب سے 5جنوری 2024کو راجستھان میں ایک تقریب پر شیر گڑھی پولیس سٹیشن کے ایس ایچ او کو ایوارڈ سے نوازا جائے گا۔ وائس آف انڈیا کے مطابق وزارت داخلہ، حکومت ہند نے سرینگر کے شیرگڑھی پولیس اسٹیشن کو ملک کے تین ‘بہترین’ پولیس اسٹیشنوں میں سے ایک کے طور پر منتخب کیا ہے۔جوائنٹ ڈائریکٹر اور کانفرنس سیکرٹری انٹیلی جنس بیورو، ایم ایچ اے گول نے انسپکٹر جنرل آف پولیس کشمیر زون، سرینگر کو مطلع کیا ہے کہ ضلع سرینگر کے شیر گڑھی پولیس اسٹیشن کو سال 2023 کے لیے ملک کے بہترین تین پولیس اسٹیشنوں میں سے ایک کے طور پر منتخب کیا گیا ہے۔ اس کارنامے کو تسلیم کرنے کے لیے، مرکزی وزیر داخلہ امت شاہ 5 جنوری 2024 کو راجستھان انٹرنیشنل سینٹر، جے پور میں ایک تقریب میں متعلقہ تھانے کے ایس ایچ او کو ٹرافی سونپیں گے۔اسٹیشن ہاؤس آفیسر (ایس ایچ او) کو ہدایت دی گئی ہے کہ وہ وزیر داخلہ امت شاہ کے ہاتھوں ذاتی طور پر ایوارڈ وصول کرنے کے لیے تقریب میں شرکت کریں۔ ادھر پولیس ذرائع نے اس بات کی تصدیق کرتے ہوئے کہا ہے کہ مذکورہ پولیس سٹیشن کی کارکردگی کے اعتراف میں وزارت نے اسے بہترین پولیس سٹیشنوں کے زمرے میں رکھا ہے ۔
