اسلام آباد پہنچنے کے فوراً بعد ممکنہ طور پر پاکستانی وزیر اعظم کی جانب دی جانے والی ضیافت میں شرکت کریں گے
سرینگر // وزیر خارجہ ایس جے شنکر شنگھائی کوآپریشن آرگنائزیشن کے کنکلیو میں شرکت کیلئے آج یعنی منگل کو پاکستان پہنچیں گے۔ سی این آئی کے مطابق طویل عرصہ کے بعد وزیر خارجہ ایس جئے شنکر شنگھائی تعاون کانفرنس میں شرکت کیلئے آج یعنی منگل کو پاکستان کا دورہ کریں گے ۔ جئے شنکر اسلام آباد پہنچنے کے فوراً بعد ممکنہ طور پر پاکستان کے وزیر اعظم شہباز شریف کی طرف سے شنگھائی تعاون تنظیم کے رکن ممالک کے مندوبین کا خیرمقدم کرنے کیلئے دی جانے والی ضیافت میں شرکت کریں گے۔دونوں فریقوں نے پہلے ہی ایس سی او سربراہان حکومت کے سربراہی اجلاس کے موقع پر جے شنکر اور ان کے پاکستانی ہم منصب اسحاق ڈار کے درمیان کسی بھی دو طرفہ بات چیت کو مسترد کر دیا ہے۔تقریباً نو سالوں میں یہ پہلی بار ہو گا کہ ہندوستان کے وزیر خارجہ پاکستان کا دورہ کریں گے، یہاں تک کہ دونوں پڑوسیوں کے درمیان مسئلہ کشمیر اور پاکستان سے ہونے والی سرحد پار سے ہونے والی دہشت گردی کے حوالے سے تعلقات کشیدہ ہیں۔معلوم ہوا ہے کہ جے شنکر پاکستان میں 24 گھنٹے سے کم قیام کریں گے۔خیال رہے کہ پاکستان 15 اور 16 اکتوبر کو SCO کونسل آف ہیڈز آف گورنمنٹ کے اجلاس کی میزبانی کر رہا ہے۔پاکستان کا دورہ کرنے والی آخری بھارتی وزیر خارجہ سشما سوراج تھیں۔ وہ دسمبر 2015 میں افغانستان سے متعلق ایک کانفرنس میں شرکت کے لیے اسلام آباد گئی تھیں۔اگست میں پاکستان نے وزیر اعظم نریندر مودی کو ایس سی او سربراہی اجلاس میں مدعو کیا تھا۔جے شنکر کا دورہ پاکستان اہمیت کا حامل ہے کیونکہ اسے نئی دہلی کی جانب سے ایک اہم فیصلے کے طور پر دیکھا جا رہا ہے۔
