10 لاکھ روپے تک کے ترقیاتی کاموں کی انتظامی منظوری کااختیار حاصل
سری نگر/یو این ایس / جموں و کشمیر حکومت نے دیہی ترقی محکمہ کے تحت مخصوص اسکیموں میں 10 لاکھ روپے تک کی لاگت والے ترقیاتی کاموں کی انتظامی منظوری دینے کے لیے اسسٹنٹ کمشنر پنچایت کو بااختیار بنا دیا ہے۔محکمہ خزانہ نے پیر کو جاری کردہ نوٹیفکیشن ایس او 231 کے ذریعے 2 نومبر 2021 کو جاری نوٹیفکیشن ایس او 375 میں ترمیم کرتے ہوئے اسسٹنٹ کمشنر پنچایت کے عہدے کو ان افسران کی فہرست میں شامل کیا ہے جنہیں انتظامی منظوری دینے کے اختیارات حاصل ہیں۔ترمیم کے تحت اسسٹنٹ کمشنر پنچایت 10 لاکھ روپے تک کی لاگت والے ان کاموں کو انتظامی منظوری دے سکیں گے جو ان اسکیموں کے تحت عمل میں لائے جائیں گے جن کی ذمہ داری اسسٹنٹ کمشنر پنچایت کو تفویض کی گئی ہے۔محکمہ خزانہ نے واضح کیا ہے کہ یہ اختیارات صرف متعلقہ افسران کو تفویض کردہ اسکیموں کے تحت ہونے والے کاموں تک محدود رہیں گے۔ اس ترمیم سے حکومت پر کسی بھی قسم کی اضافی مالی ذمہ داری عائد نہیں ہوگی اور نہ ہی اس کے تحت نئی اسامیاں پیدا کرنے یا منظور شدہ بجٹ سے زائد فنڈز جاری یا منظور کرنے کا اختیار حاصل ہوگا۔نوٹیفکیشن میں کہا گیا ہے کہ تمام انتظامی منظوریوں کو متعلقہ اسکیموں کے رہنما اصولوں، تفویض کردہ مالی اختیارات اور دستیاب بجٹ کے دائرے میں رہنا ہوگا۔حکومت نے یہ بھی واضح کیا ہے کہ تکنیکی اور مالی منظوری، ٹینڈرنگ، خریداری، ترقیاتی کاموں کی عمل آوری اور مالی نظم و ضبط سے متعلق موجودہ ضوابط بدستور نافذ رہیں گے۔ اسسٹنٹ کمشنر پنچایت کو تفویض کردہ نئے اختیارات کے باوجود کاموں کی منظوری اور عمل درآمد کے دوران ان تمام لازمی تقاضوں اور مالیاتی اصولوں کی پابندی کرنا ہوگی۔
